Abbosbek Fayzullayev Rossiya Premer-ligasidagi faoliyatini eqinda boshlaganiga qaramay, ketma-ket ikki marta SSKA futbolchilar o‘rtasida sentyabr va oktyabr oylarining eng yaxshi o‘yinchisi, deb topildi.
Legionerimiz muxlislar o‘rtasida o‘tkazilgan so‘rovnomalarda katta farq bilan g‘alaba qozonganini alohida e’tirof etish kerak.
20 yoshli hujumkor futbolchimiz o‘yinini muxlisu mutaxassislar, futbolchilar, murabbiylar baholab bormoqda.
Moyzes, SSKA himoyachisi:
- Abbosbek – biz uchun muhim o‘yinchi. U juda aqlli, tezkor futbolchi. Fayzullayev gollari va assistlari bilan jamoaga yordam beryapti.
Men Fayzullayevni yorqin kelajak kutayotganiga aminman, - dedi braziliyalik legioner.
Yevgeniy Aldonin, SSKA sobiq futbolchisi:
- Fayzullayev transferi SSKA uchun eng yoqimli syurpriz bo‘ldi. Ular bu o‘yinchini kelajakni ko‘zlab olib kelgan. Abbos endi 20 ga to‘ldi. Fayzullayev bo‘y-basti jihatidan jismoniy ko‘rsatkichlari kamtarroq bo‘lishi mumkin, lekin keyingi paytda namoyish qilayotgan o‘yini yuqori darajada.
Abbos “armiyachilar”ning hujum chizig‘ini o‘zgartirib yubordi. U tezkor, mohir, gavdasining kichikligiga qaramasdan, yakkakurashlarda g‘olib chiqyapti, har gal to‘pga birinchi yetib kelyapti.
Fayzullayevning to‘p bilan ishlash mahoratini alohida ta’kidlash kerak. U hamma ishni katta tezlikda bajaryapti, o‘yinni keskinlashtirishga usta ekan. Eng muhimi, bu futbolchi qizg‘anchiq emas, o‘zi gol urishi yoki jamoadoshiga to‘p uzatishi mumkin. Bir so‘z bilan aytganda jamoaviy o‘yinchi.
Menimcha, hozir Abbos SSKAning eng zo‘r futbolchisi. U yanada o‘sishini istayman. Fayzullayevning salohiyati katta ekaniga ishonchim komil. Hozir ajoyib o‘yin namoyish qilyapti, ammo bu bilan to‘xtamasligi kerak.
Fayzullayev qishda Yevropaga ketishi mumkinmi? Bu uning qo‘lida qanday takliflar borligiga bog‘liq masala. Agar futbolchining o‘zi va agenti SSKAni Yevropaga ketish uchun tramplin, deb bilsa, hozir hech kim kuchli ligalardan keladigan yaxshi taklifni rad etmaydi. Chunki Abbosbek ham faoliyatini rivojlantirishni istaydi. U SSKa uchun juda muhim o‘yinchiga aylanib bo‘ldi, - dedi sobiq futbolchi.
Valeriy Gazzayev, taniqli murabbiy:
- Keyingi o‘yinlarda Abbos Fayzullayev yaqqol ajralib turibdi. Bu futbolchi kun sari emas, balki soat sayin o‘syapti. Agar shu taqlid mehnat qilishda davom etsa, kelajagi porloq bo‘ladi.
Fayzullayevning salohiyati qanday? Uni ortiqcha maqtashdan yiroqman. Lekin bor gap shu: Abbosning aqli va oyog‘i tez ishlaydi. U bir zumda qaror qabul qiladi, tez yugurib ham aniq va nozik pas bera oladi. Bu juda qimmatli sifatlar. Fayzullayev o‘ziga nisbatan talabchanlikni yanada oshirishi va funksional tayyorgarlik ustida ishlashi kerak, - dedi Rossiyaning eng mashhur murabbiylaridan hisoblangan Valeriy Gazzayev.
“Zamin” yangiliklarini “Facebook”da kuzatib boring
