Abbosbek Fayzullayev legionerlarimiz orasida mavsumni eng muvaffaqiyatli o‘tkazayotgan futbolchi bo‘lib turibdi. Yosh bo‘lishiga qaramay, hamyurtimiz SSKAda asosiy figuraga aylandi, shuningdek, mutaxassislar uni Rossiya Premer-ligasining eng yorqin o‘yinchilaridan biri sifatida e’tirof etmoqda.
Rossiya futbol jamoatchiligi – murabbiylar, futbolchilar, mutaxassis Fayzullayev haqida iliq fikrlarni bildirmoqda. Futbol ishqibozlari ham jim turgani yo‘q. SSKA muxlislari ijtimoiy tarmoqlarda o‘zbek futbolchisi haqidagi fikr-mulohazalarini bildiryapti.
Sports.uz portali o‘zbekistonlik futbol ishqibozlari e’tiboriga rossiyalik muxlislarning Fayzullayev haqidagi izohlarini havola etadi.
Mau:
Fayzullayevni Yevropaga sotib yubormasliklariga umid qilaman. Abbos maosh olishni emas, futbol o‘ynashni yaxshi ko‘rishi shundoq ko‘rinib turibdi.
Artnat66:
Bu o‘yinchining iste’dodini vaqtida payqay olishdi.
Firemonster:
Fayzullayev ketma-ket ikki oydan beri muxlislar va mutaxassislar tomonidan eng yaxshi o‘yinchi, deb topilganini inobatga olsak, haqiqatan shunday. Bunaqa o‘yinchini anchadan beri kutayotgan edik. Yana ikki-uchta shunaqa transferni amalga oshirsak, zo‘r bo‘lardi. Abbos yulduzlik kasaliga yo‘liqmasa, albatta, top-o‘yinchi bo‘lib yetishadi.
Kovfun-barrios:
Men Fayzullayev jamoaga kelganidayoq bu o‘yinchi SSKAning har qanday tarbiyalanuvchisidan kuchli ekanini aytganman.
Topdispatcher:
Abbosga gap yo‘q, iqtidori katta, jamoa tanlashda ham adashmadi, joyiga tushdi.
Starttrade:
Eng yomon tomoni – Fayzullayev jamoada uzog‘i uch yil qoladi.
Hel:
Abbos jamoada uzoq qolmaydi. Uni olib ketishadi. Qishki transferlar davrida ham SSKAga o‘zbek futbolchisi uchun hujum uyushtiriladi.
A.S.AA.S.A:
Fayzullayev Rossiya Premer-ligasi o‘yinlarida katta hajmdagi ishni bajarishi bilan ajralib turibdi. U kelishi bilan “armiyachilar”ning motoriga aylandi. Hamyurti Oston O‘runovdan farqli ravishda bu yigit o‘zini yo‘qotib qo‘ygani yo‘q. Uning o‘yini borgan sari o‘sib boradi. Eng muhimi, jarohatlardan uzoq bo‘lsin!
CapralCapral:
Abbosbek ajoyib futbolchi Mixail Anni yodimga solib yubordi. Xuddi An kabi yuksak texnika va maydonni ko‘ra olish qobiliyatiga ega. O‘zbekistonda doim iste’dodlar ko‘p bo‘lgan. Abbos ham mustasno emas. Unga omad tilayman. Futbol intellekti uning peshonasiga katta harflar bilan bitilgan.
Sergeyevich:
Keyingi mavsumda Fayzullayevga qiyinroq bo‘ladi. Raqiblar uning o‘yin uslubiga qarshi moslashib oladi. Biroq keyingi yillarda jamoaga olib kelingan o‘yinchilar orasida Abbos eng kreativi va o‘ynash ishtiyoqi katta bo‘lgan futbolchidir. Fayzullayev SSKAning eng yaxshi o‘yinchisi, degan xulosalarga qo‘shilaman.
Eslatib o‘tamiz, Abbosbek Fayzullayev “Paxtakor”dan SSKA safiga avgust oyida ko‘chib o‘tgandi. Legionerimiz sentyabr va oktyabr oylarida SSKAning eng yaxshi futbolchisi, deb e’lon qilindi.
“Zamin” yangiliklarini “Odnoklassniki”da kuzatib boring
