Rossiya premer-ligasining birinchi davrasida asosiy kashfiyot sifatida e’tirof etilgan Abbosbek Fayzullaevning kelajagi eng ko‘p muhokama qilinayotgan mavzulardan biriga aylangan.
Darhaqiqat, keyingi yillarda Rossiya chempionatida Abbosdek birdaniga porlagan futbolchimiz bo‘lmagan. Hatto, Eldor Shomurodov ham "Rostov"da o‘ynagan kezlari Rossiya Premer-ligasiga moslashib, o‘z salohiyatini namoyish etgunicha bir muncha ko‘p vaqt sarflagan.
Avgustda “Paxtakor”dan TsSKaga ko‘chib o‘tgan Fayzullaev nimalarga qodirligini isbotlashi uchun atigi uchta uchrashuv kerak bo‘ldi xolos. Dastlab, ikkita bahsda bir necha daqiqadan o‘ynagan legionerimiz “Krilya Sovetov” bilan bo‘lgan bahsda ikkinchi bo‘limda maydonga tushib, jamoasini alamli mag‘lubiyatdan qutqarib qoldi.
Shundan beri Abbos TsSKAning hujum chizig‘idagi asosiy figurasiga aylangan. Deyarli barcha hujumlar Fayzullaev orqali o‘tadi.
Hozir Rossiya futboli ekspertlari va murabbiylar Abbosbek Fayzullaevning Evropada o‘ynay olish salohiyatini muhokama qilyapti.
TsSKA va Rossiya milliy terma jamoasi sobiq futbolchisi Evgeniy Aldonin o‘zbek legionerining xorijda o‘ynash imkoniyatiga baho berdi.
- Fayzullaev TsSKAning ham, chempionatimizning ham asosiy kashfiyoti bo‘ldi. U futbolimizga chaqmoqdek kirib keldi. Uning o‘yinlarini kuzatish zav bag‘ishlayapti. Abbosbek hujum uchun o‘ynaydi va vaziyatni keskinlashtiradi.
Abbosbekning yoshini inobatga olsak, aslida uni kelajak uchun transfer qilishgan edi. Biroq u darrov o‘zini ko‘rsata oldi va o‘zidan juda yaxshi taassurot qoldirmoqda.
Ko‘pchilik ekspertlar Fayzullaev hozirning o‘zida xorijning kuchli chempionatlaridan biriga o‘tishga tayyorligini ta’kidlayapti. Lekin o‘yinchining faqat Rossiya Premer-ligasidagi o‘yinlariga qarab baho berish juda qiyin.
Agar TsSKA Evrokuboklarda ishtirok etganida va Fayzullaev xalqaro maydonda ham o‘zini ko‘rsata olganida, qat’iy ishonch bilan uni Evropada o‘ynashga tayyor, desak bo‘lardi. Hozircha esa, uning qaysi jamoaga o‘tishi mumkinligi va qaysi klub o‘yinini kuchaytira olishini tasavvur qilish qiyinroq. Buni hammasini amalda ko‘rish kerak.
Ba’zilar Xvicha Kvaratsxeliya transferiga qarab, Abbos ham kuchli chempionatda o‘ynab keta olishini aytishi mumkin. Lekin Abbos endigina 20 yoshga to‘lganini, hozir TsSKA hujum chizig‘ida etakchi ekanini inobatga olib, Rossiyada qolishi va tajriba oshirishi lozimligi, keyinchalik Evropaning kuchli klubiga o‘tishi mantiqan to‘g‘riroq bo‘ladi.
Tabiiyki, Abbos uning faoliyati bir loyiha ekanini va uni rivojlantirib borish kerakligini yaxshi tushunadi. Hozircha u murakkab va etarli darajada kuchli chempionatda TsSKA sharafini munosib himoya qilyapti.
Fayzullaevning transfer summasi haqida gapirsak, uni aniq belgilash qiyin. Albatta, hozir u yozdagidan bir necha baravar qimmatlagan. Bundan tashqari, ketayotgandagi tavakkalni unutmaslik kerak. Chunki chempionatimizdan ketganlarning hammasi ham Evropada o‘ynab keta olmadi. Bunga Miranchuk va Zaxaryanni misol qilish mumkin. Bu yoshda shoshish yaramaydi. Muntazam o‘ynash va o‘yin amaliyotiga ega bo‘lish juda muhim. Agar o‘yin amaliyoti bo‘lmasa, o‘sish ham to‘xtaydi, - dedi Evgeniy Aldonin.
TsSKA Rossiya Premer-ligasidagi navbatdagi uchrashuvini 25 noyabr kuni o‘tkazadi. “Armiyachilar” 16-tur doirasida “Dinamo” futbolchilarini o‘z maydonida qabul qiladi.
“Zamin” yangiliklarini “Youtube”da kuzatib boring
