Bugun O‘zbekiston futzal milliy terma jamoasi Xose Venansio Lopes qo‘l ostidagi ilk uchrashuvini o‘tkazadi. Ispaniyalik mutaxassis haqida bilishingiz kerak bo‘lgan faktlarni e’tiboringizga havola etamiz.
Lopes deyarli butun futbolchilik faoliyatini tug‘ilib o‘sgan shahri Bilbaoning "Lehona" klubida o‘tkazgan. 80-yillar oxirida u jamoaning o‘ynovchi-murabbiyi bo‘lgan va futbolchilik faoliyatini yakunlaganidan so‘ng, murabbiylik sohasiga to‘liq qadam qo‘ygan. "Lehona"dan keyin "Bilbao" va "Kastro" jamoalariga ustozlik qilgan. Keyin esa bir muddat Ispaniya terma jamoasi murabbiylar shtabida ishlagan.
1998 yilda Lopes "Kaha Segoviya" klubiga bosh murabbiy etib tayinlandi. O‘zining birinchi mavsumidayoq u ajoyib muvaffaqiyatlarga erishgan, chempionlik, kubok va Superkubokni qo‘lga kiritadi. Keyinchalik, u klub bilan birga o‘sha yillardagi asosiy xalqaro musobaqalarda g‘alaba qozonadi: Yevropa chempionlari turniri va qit’alararo kubogi g‘olibiga aylanadi. Yana bir nechta sovrinlarni qo‘lga kiritgandan so‘ng, Lopes 2002 yilda "Kaha Segoviya"ni tark etgan.
2003 yilda Lopes Gvatemala terma jamoasini boshqarish orqali xorijda ishlash tajribasiga ega bo‘ldi, biroq tez fursatda Ispaniyaga qaytib, "Autos Lobelle" jamoasini boshqaradi. 2006 yilda u o‘zining yangi klubiga Ispaniya kubogini olib beradi.
2007 yilda Lopes Ispaniya terma jamoasi boshqaruviga keladi. U Xaver Lozano o‘rnini egallaydi. Tayinlanganidan ikki oy o‘tgach, murabbiy 2007 yilgi Yevropa chempionatida jamoani shohsupaning eng yuqori pog‘onasiga olib chiqadi. 2008 yilgi Jahon chempionatida uning boshqaruvidagi ispanlar kumush, 2010 yilgi Yevropa chempionatida esa oltin medallarni qo‘lga kiritishadi.
Keyingi yil o‘zida mundialni qabul qiladigan O‘zbekiston milliy terma jamoaga mana shunday tajribali murabbiyni jalb etdi.
“Zamin” yangiliklarini “Facebook”da kuzatib boring
