Xalqaro futbol tarixi va statistikasi federatsiyasi (IFFHS) futbol bo‘yicha turli nominatsiyalarda 2023 yil yakunlari va tahlillarini e’lon qilishda davom etmoqda.
Xalqaro tashkilot ekspertlari 2023 yil dvomida Osiyo futbol konfederatsiyasiga a’zo mamlakatlar futbolchilarining ishtirokini tahlil qilib, o‘zini ko‘rsatgan va yuqori darajada o‘ynagan o‘yinchilardan iborat qit’aning ramziy terma jamoasini tuzib chiqdi.
E’tiborli jihati shundaki, Osiyoning 2023 yilgi terma jamoasidan o‘rin olgan futbolchilarning aksariyati Evropaning eng kuchli ligalarida o‘ynayotgan charm to‘p ustalari hisoblanadi.
Demak, xalqaro tashkilot tomonidan tuzilgan “IFFHS AFC-2023” ramziy terma jamoasi tarkibi bilan tanishamiz.
Darvozabon:
Metyu RAYAN (Avstraliya) – Niderlandiyaning “AZ Alkmaar” jamoasi darvozasini qo‘riqlab kelmoqda.
Himoyachilar:
Kim Min DJE (Janubiy Koreya) – o‘tgan mavsum “Napoli” tarkibida Italiya chempioni bo‘ldi va yozda “Bavariya”ga ko‘chib o‘tdi.
Takexito TOMIYaSU (Yaponiya) – 2021 yildan beri Londonning “Arsenal” jamoasida to‘p tepyapti.
Abduqodir HUSANOV (O‘zbekiston) – 2023 yilning birinchi yarmini Belarus chempionatida “Energetik-BGU” safida o‘tkazdi. Yozda 19 yoshli himoyachini Frantsiya vitse chempioni “Lans” o‘z tarkibiga qo‘shib oldi.
Yarim himoyachilar:
Kaoru MITOMA (Yaponiya) – “Brayton”ning etakchi futbolchilaridan biri.
Daichi KAMADA (Yaponiya) – O‘tgan mavsumni Bundesliganing “Ayntraxt” jamoasida yakunlab, yozda “Latsio”ga ko‘chib o‘tdi.
Li KAN IN (Janubiy Koreya) – Ispan futbolida tarbiyalangan koreyalik futbolchi 2023 yilning yozidan PSJ safida to‘p tepmoqda. Yaqinda Li Frantsiya Superkubogini qo‘lga kiritdi.
Salim AD-DAVSARIY (Saudiya Arabistoni) – Salim ramziy terma jamoaga kiritilgan Osiyoda o‘ynayotgan yagona futbolchi. “Al-Hilol” yarim himoyachi 2018 yili yarim yil davomida “Vioyarreal”da ham faoliyat ko‘rsatgan.
Hujumchilar:
SON Xyon Min (Janubiy Koreya) – Son bugungi kunda “Tottenxem”ning asosiy to‘purari va jamoa sardori hisoblanadi.
Mehdi TAREMI (Eron) – Forslar to‘purari Portugaliya chempionatida “Portu” sharafini himoya qilmoqda va tez orada kuchli beshlik chempionatlaridan biriga o‘tishga harakat qilyapti.
Xvan Xi ChAN (Janubiy Koreya) – Bu hujumchi o‘z yurtidan tashqari, Avstriya, Germaniya chempionatlarida o‘ynagan. Ayni paytda “Vulverxempton” tarkibida Angliya Premer-ligasida to‘p tepyapti.
Ta’kidlash joizki, bu ramziy terma jamoadan o‘rin olgan futbolchilar hozir Qatar mezbonlik qilayotgan Osiyo kubogida ham ishtirok etmoqda.
O‘zbekiston milliy terma jamoasi markaziy himoyachisi Abduqodir Husanov ushbu tarkibga kiritilgan eng yosh o‘yinchi hisoblanadi. Husanov 2023 yil davomida “Energetik-BGU” safida sakkizta uchrashuvda bitta gol urdi. “Lans”ga ko‘chib o‘tganidan keyin Frantsiya yuqori divizionida oltita, Evropa Chempionlar ligasida ikkita o‘yinda maydonga tushdi.
Xalqaro miqyosda esa, O‘zbekiston U-20 terma jamoasi a’zosi sifatida Osiyo chempionatida g‘olib bo‘ldi, Argentinada yoshlar o‘rtasida o‘tkazilgan jahon chempionatida mahorati va iste’dodini namoyish qildi.
“Zamin” yangiliklarini “Telegram”da kuzatib boring
