Parij—2024. O‘zbekiston qiyin kechgan uchrashuvda Misrga mag‘lubiyatga uchradi

Fransiyaning Parij shahrida yozgi Olimpiada o‘yinlari doirasida futbol musobaqasidan o‘rin olgan guruh o‘yinlarining 2-tur uchrashuvlari bo‘lib o‘tmoqda.

O‘zbekiston milliy Olimpiya jamoasi Misrga qarshi harakat qildi. Uchrashuvning 11-daqiqasida O‘zbekiston darvozasi oldida tushunarsiz holat yuzaga keldi. Avvaliga Nematov to‘pni qaytarib yubordi. Darvoza to‘siniga tegib qaytgan to‘pni himoyachilar uzoqlashtira olmadi. Hujumchi Ahmed Kokaga tepgan to‘p darvozaga yo‘l oldi. Birinchi bo‘limning oxirlarida Abbosbek Fayzullayevning urgan goli ofsayd sabab bekor qilindi.

Uchrashuvning birinchi bo‘limi shu hisobda yakunlandi.

Ikkinchi bo‘limda Timur Kapadze Oston O‘runov o‘rniga Ruslanbek Jiyanovni tushirdi. Bo‘limni o‘zbekistonliklar hujumkor ruhda boshladi. 52-daqiqada Jasur Jaloliddinov jarima to‘pidan unumli foydalana olmadi.

55-daqiqada Eldor Shomurodov ajoyib imkoniyatga ega bo‘ldi, ammo himoyachi aniqroq harakat qildi. Shundan so‘ng ham O‘zbekiston termasi a’zolari to‘liq tarkib bilan hujumga o‘tdi. Afsuski, zarbalarning hech qaysisi darvozaga kirishni xohlamadi.

Ma’lumot uchun, O‘zbekiston olimpiyachilari birinchi turda Ispaniyaga (1:2) mag‘lub bo‘lgan edi.

C guruhi ikkinchi juftligida Ispaniya Dominikan Respublikasi darvozasiga 3 ta to‘p yo‘lladi. Raqiblarning 1 ta goli ularni mag‘lubiyatdan qutqara olmadi. Shu tariqa Ispaniya 6 ochko bilan keyingi bosqich masalasini hal qildi. “Zamin” yangiliklarini “Telegram”da kuzatib boring