Zafarmurod Abdirahmatov: "Biz qo‘limizdan kelgancha harakat qildik, lekin to‘p darvozaga kirishni istamadi"

O‘zbekiston olimpiya terma jamoasi futbolchisi Zafarmurod Abdirahmatov Misrdan uchralgan mag‘lubiyatdan so‘ng o‘yin haqidagi fikrlari bilan bo‘lishdi.

- O‘yin haqida
- Birinchi navbatda halqimizdan kechagi mag‘lubiyat uchun uzr so‘rayman. O‘yinga to‘xtaladigan bo‘lsak, har doim ham bizning rejalar amalga oshavermadi. Biz qo‘limizdan kelgancha harakat qildik, lekin to‘p darvozaga kirmadi. Demak, nasib qilmagan ekan. Misr ham yaxshi himoyalandi va g‘alati urilgan gol o‘yin natijasini hal qildi.

- Birinchi o‘yinga qaraganda yomonroq o‘yin o‘tkazdik. Ikkinchi tur bahsida bizga nimalar yetishmadi deb o‘ylaysiz?
- Kechagi bahsda bizga faqatgina gol yetishmadi. Qolgan jihatlarda ustunlik bizda edi. Misr terma jamoasi Ispaniya farqli tarzda ko‘proq himoyaga va qarshi hujumga tayangan holda o‘ynadi.

- Misr terma jamoasi bizdan kuchliroq edimi?
- Misr olimpiya terma jamoasini kuchli demagan bo‘lardim. Chunki biz hech qaysi jihatda raqibga yutqazmadik, faqatgina hisobdagi ustunlik ular tomonda bo‘ldi.

- Uchrashuv yakunlanganidan so‘ng kiyinish xonasidagi holat qanday edi?
- O‘yindan keyin kayfiyat yaxshi emas edi. Bosh murabbiyimiz bundan ham yaxshiroq ishtirok etishga qodir ekanligimizni ta’kidlab o‘tdilar. Barcha mag‘lubiyat ta’sirida edi. Keyingi uchrashuvga tayyorgarlik ko‘rishimiz kerakligi ham muhokama qilindi. Muxlislarimizga rahmat aytaman. Ular bizni ajoyib tarzda qo‘llab quvvatlashdi. Keyingi musobaqalarda va Olimpiya o‘yinlarida yanada kuchliroq bo‘lib qaytamiz va yuqori o‘rinlar uchun kurashamiz.

“Zamin” yangiliklarini “Vkontakti”da kuzatib boring