Prezident Asadxoʻja Moʻydinxoʻjaev va Lazizbek Mullajonov bilan telefon orqali suhbatlashdi

Prezident Shavkat Mirziyoev Parijdagi yozgi Olimpiya oʻyinlarida Oʻzbekiston sport delegatsiyasiga navbatdagi 2 ta oltin medalni keltirgan va ularning soni boʻyicha rekord koʻrsatkichga erishilishiga hissa qoʻshgan sportchilarimiz - bokschilar Asadxoʻja Moʻydinxoʻjaev va Lazizbek Mullajonov bilan telefon orqali suhbatlashdi.

“Boks boʻyicha Oʻzbekiston dunyoda tengsiz ekanini yana bir karra isbotlaganingiz uchun minnatdorlik bildirib, tabriklamoqchiman. Xalqimizning chinakam qahramonlari boʻldingiz. Yangi Oʻzbekistonning yangi yoshlariga juda katta oʻrnak, namuna boʻlayapsizlar. Yurtimiz oʻgʻlonlari nimalarga qodir ekanliklarini butun dunyo hamjamiyati koʻrib turdi va men sizlardan gʻururlanaman”, - dedi davlat rahbari.
Yigitlarning kechagi gʻalabalari xalqimizga juda katta mamnuniyat bagʻishlagani ta'kidlandi. Prezident yuqori natijalarga erishayotgan olimpiyachilarimizga, butun terma jamoamizga oʻzining qizgʻin salomini etkazishni soʻradi.

^{Foto: Prezident matbuot xizmati}
Chempionlar ham Prezident va xalqimiz ishonchini oqlaganidan mamnunligini bildirib, shunday gʻalabalarga erishish imkonini bergan e'tibor va keng sharoitlar uchun davlatimiz rahbariga tashakkur izhor qildi. Bundan buyon ham Vatan bayrogʻini baland koʻtarishda davom etishga va'da berdi. “Zamin” yangiliklarini “Telegram”da kuzatib boring