Yangi to‘purar Shomurodov bilan raqobatga tayyorlanmoqda

Yuqori o‘rinlar va Chempionlar ligasi yo‘llanmasi uchun kurashishni maqsad qilgan “Roma” yangi mavsum oldidan asosiy hujumchi sifatida ukrainalik Artyom Dovbikni olib keldi. Poytaxt “bo‘rilari” bu transferga 30,5 million yevro sarfladi.

Dovbik o‘z yurtidan tashqari, Moldova va Norvegiya chempionatlarida tajriba oshirgan. O‘tgan mavsumda “Jirona” sharafini himoya qilib, La Ligadagi debyut mavsumidayoq 36 ta uchrashuvda 24 ta gol va sakkizta assist muallifi bo‘ldi. Ispaniya chempionatining eng yaxshi to‘purari bo‘lgan 27 yoshli forvard Yevropaning grand klublari nazariga tushdi.

Ukrainalik to‘purar takliflar orasidan “Roma” chorlovini qabul qildi.

- “Roma” – katta tarixga ega, fantastik muxlislari bor buyuk klub ekanini bilaman. “Olimpiko” arenasidagi muhit o‘zgacha va buni darrov his qildim. La Ligada to‘purar bo‘lish muhim, bu sovrin o‘zimga bo‘lgan ishonchni oshiradi.

Men Italiyadagi ham ana shunday sovrinni qo‘lga kiritishga urinaman. Bu juda katta sarguzasht bo‘ladi, chunki men ham bir paytlar Italiya chempionatida o‘zini ko‘rsatgan Andrey Shevchenko singari hujumchiman, maydonda nimalarga qodirligimni ko‘rsataman, - dedi Artyom Dovbik Rim klubiga qo‘shilganidan keyin.

Dovbikning A Seriyadagi debyuti o‘zi kutgandek chiqmadi. “Kalyari” va “Empoli”ga qarshi uchrashuvlarda to‘liq o‘ynagan forvard raqiblar darvozasiga yo‘l topa olmadi.

“Roma”ning yangi mavsumdagi debyut golini urish Artyom Dovbik, Paulo Dibala, Matias Sule kabi asosiy hujumchilarga emas, maydonda atigi 13 daqiqa harakat qilib, “Empoli” himoyasini titratib tashlagan Eldor Shomurodovga nasib etdi.

Hozir bosh murabbiy Daniele De Rossining boshi qotgan. Italiyalik mutaxassis o‘zbek futbolchisiga munosabatini o‘zgartirdi. Eldor mashg‘ulotlarda aksariyat o‘yinchilardan yaxshi mehnat qilayotganini va o‘ziga aynan mana shunaqa o‘yinchilar kerakligini ta’kidladi.

Ukraina va jahon futbolini yoritib kelayotgan fanday.net sayti ekspertlari “Roma”ga asosiy hujumchi sifatida olib kelingan Artyom Dovbik endi Eldor Shomurodov bilan raqobatlashishiga to‘g‘ri kelishini ta’kidlamoqda.

- Endi Artyom Dombik “Roma” asosiy tarkibidagi joyi uchun raqobatga kirishishiga to‘g‘ri keladi. Rim klubi ukrainalik futbolchidan oldin gol urgan boshqa hujumchini tarkibda olib qoladigan bo‘lyapti.

“Roma” A Seriyaning dastlabki ikki turida atigi bitta gol urdi. Bu to‘pni Artyom Dovbik emas, Eldor Shomurodov “Empoli” darvozasiga kiritdi.

Italiya matbuoti, xususan, Corriere dello Sport nashri rimliklarda o‘zbek hujumchisi bo‘yicha takliflar borligi haqida ma’lumot tarqatyapti. Shu bilan birga yana bir nufuzli manba – La Gazzetta dello Sport “Roma” mutasaddilari angliyalik hujumchi Temmi Abraxamni qo‘yib yuborib, jamoada Artyom Dovbikka raqobatchi sifatida aynan Eldor Shomurodovni olib qoladigan bo‘lyapti, - deb yozdi fanday.net sayti jurnalisti Andrey Shevchenko.

Ta’kidlash joizki, Eldor Shomurodov Artyom Dovbikdan ayrim ustunliklarga ega. Birinchidan, o‘zbek legioneri A Seriyada beshinchi mavsumini o‘tkazmoqda va Italiya futboliga har tomonlama moslashib bo‘lgan.

Shuningdek, hamyurtimiz universal hujumchilar toifasiga kiradi. Asosiy pozitsiyasi hujum markazi bo‘lishiga qaramay, Eldor har ikki qanotdan hujum uyushtirishga moslashgan va ayrim uchrashuvlarda yarim himoyachi yoki pleymeyker vazifasini ham bajarib keladi.

Artyom Dovbik hali Italiya futbolidan tashqari bu mamlakatning turmush tarzi, tili va urf-odatlariga moslashishiga muayyan vaqt ketadi.

Maydonda esa, Artyom Dovbik faqat markaziy hujumchi sifatida o‘ynaydi va asosiy vazifasi raqib darvozasini ishg‘ol qilish hisoblanadi.

Demak, bizni qiziq mavsum kutmoqda. Ko‘p narsa yozgi transferlar oynasining so‘nggi kunlarida Eldor Shomurodov va “Roma” qanday qarorga kelishiga bog‘liq bo‘ladi. Legionerimiz atrofidagi vaziyatni kuzatishda davom etamiz. “Zamin” yangiliklarini “Odnoklassniki”da kuzatib boring