Jahon chempionatiga chiqish uchun Oʻzbekistonga qancha ochko kerak?

Eron bilan oʻyindagi gʻalaba bizga qoʻshimcha ochkolardan tashqari, keyingi oʻyinlar uchun yaxshigina ustunlik bergan boʻlardi. Shu ma'nodaki, har qanday davraviy musobaqada jamoalar maqsadga etish uchun qanchadir ochko olishni rejalashtiradi va oʻyinlarning ogʻir-engilligiga qarab, ushbu ochkolarni taqsimlaydi. Masalan, ba'zi oʻyinlarda gʻalaba qozonish shart, chunki asosiy raqiblar ham oʻsha jamoaga qarshi oʻyinda yoʻqotishga uchramasligi mumkin, ba'zi oʻyinlarda esa, durang ham qoniqtiradi yoki magʻlubiyat u qadar ogʻriqli qabul qilinmasligi mumkin.

Shu jihatdan, Eron bilan Toshkentda durang oʻynash qoniqarli natija boʻlsa-da, oʻyinning ma'lum pallasida bir kishi koʻp boʻlib qolib, gʻalabaga imkoniyat paydo boʻlgani biz uchun qoʻshimcha bonus yaratishi mumkin edi. Uch oʻyindan soʻng 9 ochkoga ega boʻlish rejadagidan ham koʻproq, ya'ni biz ochko toʻplash rejimida oldinga chiqib olardik. Bu jamoamizni qoʻshimcha bosimdan xalos qilar, futbolchilarda har qanday oʻyinda xato qilish imkoniyatini taqdim etgan boʻlar, qaysidir pallada kutilmagan ochkolarni yoʻqotish ham u qadar ogʻriqli boʻlib chiqmasdi.

Mayli, boʻlar ish boʻldi. BAAga qarshi oʻyin Eronga nisbatan engilroq tuyulsa-da, aynan bosim nuqtayi nazaridan ogʻirroq. Chunki, BAAga qarshi yutqazishga haqqimiz yoʻq, durang ham Eron bilan boʻlgani qadar engil qabul qilinmasligi mumkin. Qoniqarsiz natija bizni ochko toʻplash rejimida orqada qoldiradi, xato qilish imkoniyatimizni kamaytirib, keyingi oʻyinlar oldidan keradigan ortiq bosimga duchor kelishi mumkin.

Jahon chempionatiga toʻgʻridan toʻgʻri chiqish uchun biz guruhdagi dastlabki ikki oʻrindan birini egallashimiz kerak. Soddaroq qilib aytganda, guruhda birinchi va ikkinchi oʻrin emas, ikkita birinchi oʻrin bor – ikkalasiyam jahon chempionatiga chiqadi.

Demak, mantiqli savol tugʻiladi, ikkinchi oʻrindan pastga tushib ketmasligimiz uchun necha ochko toʻplashimiz kerak?

Tabiiyki, bu savolga javob guruhdagi boshqa natijalarga ham bogʻliq. Lekin, bizning guruh uchun aniq necha ochko kerakligini bilmasak ham, umumiy olib qaraganda shu kabi guruhlarda ikkinchi oʻrin uchun eng kami necha ochko kerak boʻlganinini avvalgi musobaqalarga qarab bilib olish mumkin.

Shu kungacha jahon futboli tarixida oltita jamoadan iborat hozirgi biz oʻynayotgan format bilan bir xil guruhlar Osiyoda ikki marta, Evropada 33 marta kuzatilgan.

Futbol tarixidagi barcha olti jamoalik guruhlardagi natijalar:

Jadvalga nazar solinsa, Osiyoda oltitalik guruh endi boshlandi, oʻtgan Jahon chempionati saralashida, biz yakuniy bosqichga chiqa olmagan musobaqada birinchi marta qoʻllandi. Oʻshanda A guruhida Janubiy Koreya 23 ochko bilan, V guruhida Yaponiya 22 ochko bilan ikkinchi oʻrinlarni egallashgan. A guruhida BAA 12 ochko bilan, V guruhida Avstraliya 15 ochko bilan uchinchi oʻrinda qolib ketgan. Demak, toʻrt yil oldin shu bosqichda 22 ochko jahon chempionatiga toʻgʻridan toʻgʻri chiqish uchun etarli boʻlgan.

Evropada olti jamoadan iborat guruhlarga misollar koʻproq. 1996 yilgi Evro saralashidan tortib, 2024 yilgi Evro saralashigacha uchratish mumkin olti jamoalik guruhlarni. Ularning natijalarini oʻrganib chiqib, 20 ochko olgan jamoa doim ikkinchi oʻrindan pastga tushib ketmaganiga guvoh boʻlamiz. Bir marta 20 ochko olgan jamoa uchinchi oʻrinda qolib ketgan (Evro 1996 saralash, 5 guruh), lekin oʻshanda ham uchinchi oʻrindagi Norvegiya va ikkinchi oʻrindagi Niderlandiya bir xil ochko toʻplashgan.

Tarixdagi natijalarga nazar tashlansa, olti jamoalik guruhda 16 ochko bilan ham ikkinchi oʻrinni egallasa boʻladi, 17, 18 va 19 ochko olib ikkinchi oʻrinni egallaganlar ham bor. Lekin Osiyo va Evropani qoʻshib hisoblaganimiz ushbu 35 ta guruhning hech qaysida 20 ochko olgan jamoa ikkinchi oʻrindan pastda qolib ketmagan.

Albatta, ba'zi qoʻshimcha omillarni ham hisobga olish lozim boʻladi. Masalan, yuqorida tilga olingan guruhlarda asosiy kurash 1-2 oʻrinlar uchun boʻlgan, ya'ni aksariyat jamoalar musobaqaning yarmida ortda qolib ketib, keyingi oʻyinlarga yondashuvni pasaytirib yuborgan holatlar ham yoʻq emas. Bizning guruhda esa, 3-4 oʻrinlar uchun ham kurash boʻlishini e'tiborga olsak, deyarli har bir jamoada soʻnggi turlargacha 4-oʻringa ilashish imkoniyati saqlanib qolishi mumkin.

Ikkinchidan, Evropada misol keltirilgan guruhlar shunchaki qur'a yordamida yigʻilgan, ya'ni har qanday jamoa joy olishi mumkin boʻlganidan, San-Marino, Lyuksemburg kabi jamoalar ham boʻlgani, bu esa, har bir peshqadam uchun qoʻshimcha 6 ochko berganini ham qayd etish lozim boʻladi. Oʻzbekistonning hozirgi guruhi esa, uchinchi bosqich boʻlib, avvalgi bosqichlardan saralanib kelingan, oʻziga yarasha kuchli va qarshilik darajasi yuqori boʻlgan jamoalardan iborat.

Mana shu ikki omilni ham qoʻshib, xulosa qilish mumkinki, bizning guruhda ochko olish biroz qiyinroq boʻladi va bu degani, yuqoridagi jadvaldagi oʻrtacha koʻrsatkichlardan kamroq ochko ham 2-oʻrinni kafolatlashi mumkin.

Bizda hozirda 7 ochko bor. Bugun gʻalaba qozonsak, ochkolar soni 10 ta boʻladi va marraning yarmiga etildi deb hisoblash mumkin. Marraning yarmiga jami oʻyinlarning yarmini oʻtkazmasdan (Qatar bilan oʻyinlar oldinda), ammo shu bilan birga, oʻz maydonimizdagi 5 oʻyinning yarmidan koʻpini oʻtkazgan holda etib kelgan boʻlamiz.

Ochkolar soni 20 taga etmaguncha boʻshashish yoʻq!


Manba: Tribuna.uz “Zamin” yangiliklarini “Telegram”da kuzatib boring