“Navbahor”da ishlagan Andrey Kanchelskis Abbosbek Fayzullayevga Yevropadan bo‘layotgan e’tibor haqida nimalar dedi?

Qishki transferlar oynasi ochilishiga yaqin SSKAda o‘ynayotgan legionerimiz Abbosbek Fayzullayevga ikkita jiddiy klubdan qiziqish bo‘layotgani haqida ma’lumotlar tarqaldi.

Xususan, Fransiya va Ispaniyaning mashhur klublaridan “Monako” va “Real Sosedad” o‘zbek futbolchisini o‘z safiga qo‘shib olish imkoniyatlarini o‘rganib chiqmoqda.

Ta’kidlash joizki, ushbu har ikki klub Rossiya futbolini muntazam kuzatib keladi va shu mamlakat ligasidan yetishib chiqqan iqtidor egalarini o‘z safiga qo‘shib olish amaliyotini qo‘llab keladi.

Bugungi kunda rossiyalik charm to‘p ustalaridan Aleksandr Golovin “Monako” va Arsen Zaxaryan “Real Sosedad” a’zosi hisoblanadi.

Rossiyalik mashhur futbol eksperti, “Navbahor”ning sobiq bosh murabbiyi Andrey Kanchelskis Abbosbek Fayzullayevga Yevropadan bo‘layotgan e’tiborga o‘z munosabatini bildirdi.

- Agar Abbosbek Fayzullayevga Yevropadan aniq taklif tushsa va hujjatlar imzolanadigan bo‘lsa, bundan nimalar kelib chiqishini sizga aytib berishim mumkin.

Darhaqiqat, Abbosni men “Lokomotiv Moskva” klubiga olishni tavsiya qilgan edim. Fayzullayev juda yaxshi futbolchi. SSKAda asosiy tarkibga mustahkam o‘rnashib oldi, muntazam o‘zini ko‘rsatib kelmoqda.

Eng muhimi, oldinga qadam bosish va to‘g‘ri yo‘nalishda harakat qilish.

Agar Abbos “Monako”ga o‘tadigan bo‘lsa bu jamoadagi Aleksandr Golovin rus tilida gaplasha oladigan futbolchi kelganidan mamnun bo‘lishi kerak. Qolaversa, uning o‘zi ham Fayzullayevga yangi muhitga moslashishida yordam berishi mumkin. Ularga faoliyatlarida muvaffaqiyat tilaymiz, - dedi Andrey Kanchelskis.

Ta’kidlash joizki, Rossiya futbolining taniqli ekspertlarining aksariyati Abbosbek Fayzullayevga taklif bo‘lsa, Yevropaga ketishni maslahat bermoqda.

Yaqinda FIFA mutasaddilari Rossiyaning bir necha klublariga transfer ta’qiqini qo‘ygan edi. Xususan, bu sanksiyaga o‘zbek futbolchilarini o‘z safiga qo‘shib olgan SSKA va “Ximki” klublari ham bor.

Bu xabardan keyin ko‘pchilik FIFAning ta’qiqi Abbosbek Fayzullayevning Yevropaga yo‘l olishiga to‘sqinlik qilishi mumkinligi haqida xavotir bildira boshladi.

Biroq futbol sohasidagi yuristlarning ma’lum qilishicha, FIFA reglamentida ta’qiqlar yangi o‘yinchilarni tarkibga qo‘shish va ularni musobaqalar qaydnomasida ro‘yxatdan o‘tkazish masalalariga qo‘yilgani belgilangan. Bu vaziyatda o‘yinchilarning ta’qiq qo‘llanilgan klublardan boshqa jamoalarga o‘tishiga hech qanday to‘sqinlik yo‘q. Bunda eng muhim jihat – klublarning o‘zaro kelishuvi va o‘yinchining transferga roziligi ekani aytilmoqda.

Abbosbek Fayzullayevga xorij klublaridan chorlov bo‘layotganini inobatga olgan SSKA rahbariyati jamoa yetakchisiga yangi shartnoma taklif qiladigan bo‘ldi.

Demak, tez orada 21 yoshli hujumkor futbolchimiz kelajagi bo‘yicha bir qarorga kelishiga to‘g‘ri keladi. Fayzullayev atrofidagi vaziyatni kuzatishda davom etamiz! “Zamin” yangiliklarini “Instagram”da kuzatib boring