“Tottenxem”ga Abduqodir Husanovning yordami kerak(mi?)

“Lans” yulduzi Abduqodir Husanovga da'vogarlik qilayotgan qudratli klublar orasida “Tottenxem”ning nomi ham koʻp zikr qilinmoqda.

Buyuk Britaniyaning nufuzli manbalaridan biri standard.co.uk portali ekspertlari “Tottenxem”ning tarkibi va transfer siyosatini tahlil qilish jarayonida jamoaga 20 yoshli oʻzbek himoyachisi kerak ekani haqida ham gapirishdi.

- Jarohatlarning koʻpligi ketma-ket ikkinchi mavsumda “Tottenxem”ni murakkab ahvolga solib qoʻydi. Bosh murabbiy Ange Postekoglu agar jamoa musobaqa jadvalining ikkinchi qismidan klub mavqeiga yarashadigan yuqori oʻrinlarga koʻtarilishni istasa, yanvarda tarkibni kuchaytirish zarur ekanini ta'kidladi.

“Shporlar” keyingi yillarda Deyan Kulusevski, Rodrigo Bentankur, Pedro Porro, Radu Dragushin va Timo Verner kabi bir necha yangi ijrochilar evaziga tarkibni oʻzgartirib bormoqda.

Avstraliyalik bosh murabbiy bundan buyon qimmatbaho va mashhur oʻyinchilar oʻrniga kelajakda ham samara berishi mumkin boʻlgan yosh iqtidorlarga e'tibor qaratish maqsadga muvofiq ekanini aytmoqda. Ana shu reja asosida jamoa Janubiy Koreyaning “Kanvon” jamoasidan 18 yoshli hujumchisi Min Xyok Yanni olib keldi.

Postekoglu “Bizga yordam kerak. Ayniqsa, oʻyinchilarimizga koʻmak zarur. Klub buni amalga oshirish uchun qattiq ishlayapti”, dedi.

Bosh murabbiy “yordam” deganda, yangi ijrochilarni nazarda tutdi. Chunki darvozabondan tortib, hujum chizigʻigacha kuchaytirilishi kerak boʻlgan pozitsiyalar bor.

Xususan, klub texnik direktori Yoxan Lange yangi oʻyinchilarni ortiqcha ovozasiz, jimgina transfer qilishni xush koʻradi. Uning asosiy nishonlaridan biri “Lans”da oʻynayotgan Abduqodir Husanovdir.

“Tottenxem” anchadan beri “Kristal Pelas” markaziy yarim himoyachisi Eberechi Ezeni olishni moʻljallab yurgan edi. Lekin bu transferni yanvarda amalga oshirish deyarli imkonsiz. Shu bois, klub qishda 20 yoshli oʻzbek futbolchisi transferiga e'tibor qaratdi.

Endi himoya chizigʻini kuchaytirish navbati keldi. Chunki himoya chizigʻi etakchilaridan Radu Dragushin toʻpigʻidan jiddiy shikastlangan. 2015 yildan beri asosiy himoyachilaridan boʻlgan 33 yoshli Ben Devisning oʻyinida pasayish kuzatilmoqda va uelslik futbolchiga ishonch bildirilmayapti.

2020 yili “Real”dan olingan Serxio Regilon hali ham tarkibga kira olgani yoʻq va joriy mavsumda hali bitta ham oʻyin oʻtkazmadi. “Shporlar” yangi futbolchilarga joy ochish uchun Serxio Regilon va gol urolmayotgan hujumchi Timo Verner kabi oʻyinchilar xizmatidan voz kechishga tayyor, - deb yozdi standard.co.uk portali eksperti Den Kilpatrik.

Eslatib oʻtamiz, Abduqodir Husanov 2023 yilning yozidan beri “Lans” sharafini himoya qilib kelmoqda. Bugungi kunda 20 yoshli himoyachi transfermarkt.world portali tomonidan 12 million evroga baholanmoqda. Biroq “Lans” rahbariyati oʻz yulduzi uchun 30 million evro atrofida mablagʻ talab qilishi haqida ma'lumotlar chiqdi.

Demak, Husanov atrofidagi vaziyatni kuzatishda davom etamiz... “Zamin” yangiliklarini “Telegram”da kuzatib boring