Superliganing 2024 yilgi kashfiyoti Anvarjon Hojimirzayev bilan intervyu

Ortda qolayotgan yilda oʻzbek futboli koʻplab qiziqarli voqealarga boy boʻldi va yangi nomlarni kashf etdi. 2024 yilgi mavsumda yorqin porlagan futbolchilardan biri - "Dinamo" a'zosi Anvarjon Hojimirzayev boʻldi. Bundan bir mavsum muqaddam Pro Liga toʻpurari boʻlgan Hojimirzayev, Superligaga qaytishi bilanoq, terma jamoa safidan joy olishi kerak boʻlgan asosiy figuralardan biriga aylandi.

Anvar Hojimirzayev uchun ortda qolgan yil qanday oʻtdi? Jamoasi qayd etgan natijalardan koʻngli toʻldimi? 2025 yildagi maqsadlari qanday? Barcha savollarga futbolchining oʻzi javob berdi.

- Assalomu alaykum, Anvar aka. Yakunlangan mavsum haqida fikr bildirib oʻtsangiz. "Dinamo" yakunda egallagan oʻrindan koʻnglingiz toʻldimi? Oʻzingiz namoyish etgan oʻyindan qanchalik qoniqdingiz? Ortda qolgan 2024 yil siz uchun qanday oʻtdi?
- Yomon mavsum oʻtkazmadik. Albatta, bundan-da yaxshiroq natija qayd etishimiz mumkin edi. Bizga nasib qilgan oʻrin shu ekan. Shaxsan oʻzim uchun ham mavsum yaxshi oʻtdi, ammo 100% koʻnglim toʻldi deya olmayman. Men yanada yaxshiroq oʻyin namoyish etishim mumkin edi.

- "Dinamo" bilan shartnomangizni yana bir mavsumga uzaytirdingiz va keyingi mavsumda ham Samarqand jamoasi safida toʻp tepasiz. "Dinamo" safida qolishingizga asosiy sabab nima boʻldi?
- Samarqand oʻz uyimdek boʻlib qolgan. Samarqandlik muxlislar va rahbariyat qolishimni istashdi va men bunday yaxshi insonlarga rad javobini bera olmadim.

- Superliganing boshqa jamoalaridan ham takliflar boʻldimi? Boshqa klublar moliyaviy jihatdan ancha yaxshiroq imkoniyatlar taqdim etgandir...
- Albatta, chempionatimizning eng etakchi klublaridan takliflar boʻldi. Toʻgʻrisini aytsam, men toʻgʻri qaror qabul qildim deb oʻylayman. Barchasini vaqt koʻrsatadi.

- 2024 yilgi mavsumni bunday barqaror oʻtkazganingizga nima sabab boʻldi? Masalan, toʻpurarlik poygasida ishtirok etgan koʻpgina futbolchilarga barqarorlik etishmadi va ular mavsumni bir tekisda oʻtkaza olishmadi.
- Mening yorqin oʻyinlarimda jamoadoshlarimning hissasi katta. Bir oʻzim hech qanday natija koʻrsata olmas edim. Jamoaviy oʻyin tufayli shunday natijalarga erishdim.

- "Dinamo" yangi mavsumda oʻz oldiga qanday maqsadlar qoʻygan? Jamoa yangi mavsumga tayyorgarlikni qachon boshlaydi?
- Sovrinli oʻrinlar uchun kurashishni maqsad qilganmiz. Jamoamiz bilan 3 yanvar kuni Toshkentda yigʻilamiz va tayyorgarlikni boshlaymiz.

- 2023 yilda Pro liga toʻpurari, 2024 yilda mavsum kashfiyoti va ligadagi eng yaxshi futbolchilardan biri boʻldingiz. Kirib kelgan 2025 yilda qaysi choʻqqini zabt etmoqchisiz?
- Yangi mavsumda eng toʻpurar boʻlishni niyat qilganman.

- Milliy terma jamoamiz yanvar oyida BAAda yigʻin oʻtkazadi. Siz ham terma jamoamizning navbatdagi yigʻinlariga chaqirildingiz. Terma jamoadagilar sizga aloqaga chiqishdimi? Chaqiruvdan keyingi hissiyotlar qanday boʻldi? Terma jamoaga qanday maqsadlar bilan yoʻl olmoqdasiz?
- Ha, aloqaga chiqishdi. MTJ safidagi maqsadim terma jamoamizga imkon qadar yordam berish va Jahon chempionati yoʻllanmasini qoʻlga kiritish.

- 2025 yilda oʻz oldingizga qanday maqsadlar qoʻydingiz? Yangi mavsumda ham individual sovrinlar uchun kurasha olasizmi?
- Superligada medallar uchun kurashish va toʻpurarlik poygasida gʻolib boʻlish, yangi mavsumdagi asosiy maqsadlarim.

- Ortda qolgan yilda siz uchun futboldagi qaysi voqealar eng esda qolarlisi boʻldi?
- "Dinamo" safiga kelib qoʻshilishimdan boshlab hamma-hammasi esimda. Ushbu voqealar men uchun eng qadrlisi boʻldi.

- Samimiy suhbat uchun tashakkur. Futbol hamjamiyatiga va muxlislarga tilaklar va niyatlaringiz boʻlsa marhamat...
- Butun Oʻzbekiston ahlini yangi yil bilan tabriklayman. 2025 yil hammamiz uchun yaxshi kelishini tilab qolaman.

“Zamin” yangiliklarini “Telegram”da kuzatib boring