"Paxtakor"ning yangi bosh murabbiyi Pedru Moreyra futbolchilar bilan tanishdi

Pedru Moreyra va uning murabbiylar shtabi "Paxtakor" jamoasi a'zolari bilan tanishdi. Portugaliyalik mutaxassis Antaliyada jam boʻlgan futbolchilar bilan yaqindan tanishish maqsadida uchrashuv tashkil qildi. Bu haqda "Paxtakor" klubi matbuot xizmati xabar berdi.

"Biz bu erga sizlar bilan katta ishni bajarish uchun toʻplandik. Imkon qadar "Paxtakor"dagi oʻyinlaringizni koʻrib, sizlar bilan tanishishga harakat qildim. Qolgan ma'lumotni mashgʻulot va oʻrtoqlik oʻyinlarida olamiz. Klub raisi Jahongir Abidovichning taklifiga koʻra, katta murabbiylar jamoasi bilan Toshkentda ish boshlaydigan boʻldik. Mening va doʻstlarimning maqsadi sizlar bilan yuqori natijalarga erishish. Siz "Paxtakor"siz, bu klubni oʻrganar ekanman, oʻzbek futbolining ustuni ekanligiga amin boʻldim. Bunday katta jamoada ishlash biz uchun ham sharaf", - deydi Moreyra.

Xabaringiz bor, "sherlar" negizi saqlab qolindi. Igor Sergeyev va Bashar hujum chizigʻiga olib kelindi.

"Agar biz barcha vazifalarni oʻz vaqtida bajaradigan boʻlsak, ishoning, bizdan kuchlisi boʻlmaydi. Men bu erga kelib, Siz oʻrganib qolgan hamma narsani oʻzgartirib yubormayman. Qayerdadir biz Sizlarga, qayerdadir, Siz bizlarga moslashasizlar. Futbol jamoaviy oʻyin, ishimiz ham shunday birgalikda boʻlishi kerak. Yil oxirida mana shunday kayfiyatda gʻalabalarni tahlil qilish haqida oʻylashimiz kerak", - deya bosh murabbiy tugʻilgan kunini nishonlayotgan Ulugʻbek Hoshimovni tabrikladi.


Delegatsiya rahbari, klub raisi oʻrinbosari Dilshod Karimov quyidagi gaplarni aytib oʻtdi:

- "Biz bir tanu, bir jon boʻlishimiz kerak. Shundagina ahil oila sifatida shakllanamiz. Bu juda muhim. Siz bir-biringizni qoʻllab-quvvatlab, bir oila boʻling. Klubimiz raisining Sizlardan talab qiladigan yagona narsasi muxlislarga yoqadigan chiroyli oʻyin koʻrsatish. Shu erga "Paxtakor" bilan etib keldingizmi, demak Siz eng zoʻrlarisiz. Buni maydonda isbotlashingiz qoldi". “Zamin” yangiliklarini “Youtube”da kuzatib boring