Xayr “Real”, alvido “Siti”! Boshqa superklub Husanovni olish yoʻlini topdi...

Qishki transferlar oynasi bilan “Lans”da oʻynayotgan Abduqodir Husanov uchun kurash qizgʻin pallaga kirib bormoqda. 20 yoshli markaziy himoyachimizga Fransiya, Ispaniya, Angliya, Italiya, Germaniya, Turkiya kabi mamlakatlarning yigirmaga yaqin klublari qiziqish bildirayotgan boʻlsa, keyingi kunlarda Husanovning nomini “Real”, “Manchester Siti”, “Pari Sen-Jermen” kabi chempion jamoalar bilan birga tilga olish dolzarb mavzuga aylandi.

Ayniqsa, soʻnggi pallada “Manchester Siti” oʻzbek futbolchisi boʻyicha “Lans” bilan muzokara boshlagani, kurashga “Real” qoʻshilgani juda koʻp muhokama qilinmoqda.

E'tiborlisi shundaki, Husanovni PSJ Angliya va Ispaniya chempionlariga boy berib qoʻymoqchi emas. Parijliklar Husanov uchun kurashda ustunlikni oʻzlari tomonga ogʻdiradigan, "Lans"ga ma'qul kelishi kutilayotgan echimlarni taklif qila boshladi.

Fransiya futbolini yoritib kelayotgan nufuzli manbalardan biri – foot-sur7.fr portali Parij superklubining Abduqodir Husanov transferi uchun amalga oshirayotgan ishlari haqida asosli ma'lumotlarni taqdim etdi.

- Oʻz himoya chizigʻi markazini yosh iste'dod egasi yordamida mustahkamlashga qaror qilgan PSJ qishki transferlar oynasi davomida Abduqodir Husanov transferi boʻyicha “Lans” bilan kelishuvga erishishga bel bogʻladi.

Yanvarda Milan Shkrinyarning ketishini inobatga olgan parijliklar shu oyning oʻzida uning oʻrnini Husanov bilan toʻldirishga jiddiy tarzda kirishdi.

Aslida PSJ bu pozitsiyaga Tomas Arauxoni moʻljallagan edi, biroq “Benfika” oʻz himoyachisini 100 million yevroga baholagani poytaxt klubi sport direktori Luish Kampushni boshqa echim topishga majbur qildi.

Buni inobatga olgan Kampush Husanov nomzodida toʻxtadi. 20 yoshli oʻzbek futbolchisi 2023 yili “Lans”ga kelganidan beri Liga 1 oʻyinlarida oʻzini koʻrsatmoqda. Frank Xeyz qoʻl ostida “Lans”ning asosiy tarkibidan oʻrin olgan himoyachi Uill Still davrida jamoa etakchisiga aylandi va ayni paytda Fransiyadagi eng kuchli besh himoyachidan biri hisoblanadi.

PSJ Husanovni qoʻlga kiritish uchun ichki chempionatda “Marsel”, Evropa miqyosida – “Atletiko Madrid”, “Manchester Siti”, “Nyukasl Yunayted” kabi bir necha grand klublar bilan raqobatlashishiga toʻgʻri kelmoqda. Endi ispan matbuoti, xususan Fichajes nashri Abduqodirga “Real” ham da'vogarlik qila boshlagani haqida bong urmoqda.

Bu holatda “Lans” oʻzi uchun eng manfaatli va qulay taklifni qabul qiladi. “Pari Sen-Jermen” bu borada boshqa nomzodlardan ustunlikka ega.

“Lans” darvozaboni Bris Samba boshqa klubga oʻtishga qaror qilgan. PSJ uning oʻrniga yaxshi saviyadagi darvozabon qidirayotgan “Lans”ga Abduqodir Husanov transferi doirasida uchinchi golkiperi Arnau Tenasni olishni taklif qilmoqda.

Luish Kampush iste'dodli ispan posbonini berish orqali “Lans” rahbariyatini oʻzbek futbolchisini aynan Parijga joʻnatishga koʻndirishni maqsad qilgan. Demak, Abduqodir Husanov atrofidagi vaziyat qizgʻin pallaga kirgan va “Lans” qanday echimni qabul qilishini tez orada bilib olamiz, - deb yozmoqda foot-sur7.fr portali.

Transfermarkt portali Abduqodir Husanovni 12 million yevroga baholamoqda. Biroq bu summa “Lans”ni qoniqtirmaydi. Fransiya klubi oʻz kashfiyoti uchun 20-30 million yevro atrofida badal puli talab qilishi aytilmoqda. “Zamin” yangiliklarini “Instagram”da kuzatib boring