Angliya kubogi. "Manchester Siti" raqib jamoa darvozasiga javobsiz 8 ta gol urdi!

“Manchester Siti” jamoasi futbolchilari Angliya kubogi doirasida yirik hisobda zafar quchdi. Musobaqaning 1/32 final bosqichida uchinchi divizion vakili “Solford Siti” bilan roʻbaroʻ kelgan manchesterliklar mehmonlarni ayab oʻtirmadi.

Xosep Gvardiola shogirdlari “Solford Siti” darvozabonini oʻz ortidan 8 marotaba toʻp olib chiqishga majbur qildi.

Gʻalaba keltirgan gollardan uchtasini Jeyms Makeyti, ikkitasini Jeremi Doku, qolganlarini Divin Mubama, Niko O'Rayli, Jek Grilish kiritdi.

E'tiborli jihati, Jek Grilish penaltini aniq bajarib, bir yil-u ikki oy davom etgan golsiz seriyasiga barham berdi.

"Manchester Siti" — "Solford Siti" 8:0
Gollar: 1:0 – 8 Doku, 2:0 – 20 Mubama, 3:0 – 43 O`Rayli, 4:0 – 49, penalti Grilish, 5:0 – 62 Makati, 6:0 – 69, penalti Doku, 7:0 – 72 Makati, 8:0 – 81 Makati.
"Manchester Siti": Ederson, O`Rayli, Ake (Akandji, 46), Simpson-Pyuzi, Doku (Kovachich, 74), Savio (Foden, 55), Grilish, Gyundogan, Makati, Mateush Nunesh, Mubama.
"Solford Siti": Yang, Garbatt, Tilt, Sheferd, Eshli (Uotson, 58), Forna, Land (Makeleni, 70), Berko, Mnoga (Teylor, 58), Adelakun (Rayt, 87), Kuassi (Stokton, 70).
Ogohlantirish: Sheferd (21), Tilt (60).

Angliya kubogi musobaqasida “Manchester Siti” jami etti marotaba gʻolib chiqqan va mamlakat klublari oʻrtasida kubokni qoʻlga kiritish boʻyicha “Aston Villa” bilan oltinchi pogʻonani boʻlishib turibdi.

Xosep Gvardiola shogirdlarida oʻtgan mavsumda ettinchi sovrinni oʻziniki qilish imkoni tugʻilgan edi. Biroq Angliya chempionligiga sazovor boʻlgan jamoa mamlakat kubogi uchun oʻtkazilgan finalda “Manchester Yunayted”ga 1:2 hisobida yutqazib qoʻydi.

Ta'kidlash joizki, Abduqodir Husanov “Manchester Siti”ga koʻchib oʻtganidan keyin jamoasi Angliya Premer-ligasida kuchli toʻrtlikdan joy olsa, Evropa chempionlar ligasi yoʻllanmasi uchun kurashda ishtirok etadi.

Garchi Xosep Gvardiola shogirdlari joriy mavsumda Angliya chempionligi uchun kurashish imkoniyatini qoʻldan boy bergan boʻlsa-da, Husanov yangi jamoasi safida mamlakat kubogi uchun kurashish imkoniyatiga ega.

Shuningdek, “shaharliklar” mamlakat chempioni sifatida hali qit'a miqyosidagi eng nufuzli musobaqa – Evropa Chempionlar ligasidagi yurishlarini davom ettirmoqda.

Eslatib oʻtamiz, Evropaning barcha nufuzli manbalari “Manchester Siti” mutasaddilari Oʻzbekiston milliy terma jamoasi oʻyinchisi uchun Fransiyaning “Lans” klubiga 40 million yevro badal puli va 10 million yevro bonus toʻlashi haqida ma'lumot chiqardi. “Zamin” yangiliklarini “Telegram”da kuzatib boring