Husanov "Lans" muxlislari bilan xayrlashdi: "Lans"ning bir boʻlagi boʻlganimdan faxrlanaman!

Faoliyatini Angliya Premer-ligasida davom ettiradigan Abduqodir Husanov sobiq jamoasi "Lans" bilan xayrlashdi.

Aziz doʻstlar,

Yuragimda alohida oʻrin tutgan va Evropadagi ilk katta sarguzashtim boʻlgan "Lans" jamoasi bilan xayrlashish vaqti keldi.

Fransiya va Lans shahriga samimiy qabul uchun katta rahmat! Fransiya menga eshiklarini ochdi, frantsuzlar menga mehribon edi. Buning uchun sizlarga rahmat. Fransiya – imkoniyatlar mamlakati, menga frantsuz madaniyati, frantsuz tili va albatta frantsuz futboli juda yoqdi.

Oʻtgan bir yarim yil davomida meni qoʻllab-quvvatlagan barchaga chuqur minnatdorlik bildiraman. Uill Still boshchiligidagi hozirgi va Frenk Ez boshchiligidagi oldingi murabbiylar shtabiga ishonch va rivojlanishimdagi hissalari uchun katta rahmat.

Jamoadoshlarimga tashakkur. Birinchi kundanoq mehr bilan qarshi olib, moslashishga yordam berdingiz. Sizlar tufayli maydonda ham, maydon tashqarisida ham oʻzimni uydagidek his qildim.

Stadion va mashgʻulot bazasidagi xodimlarga, ishchilarga ham rahmat. Va, albatta, "Lans"ning ajoyib muxlislariga katta rahmat. Siz jamoangiz uchun hamma narsaga tayyor boʻlgan haqiqiy armiyasiz. Bizni olgʻa etakladingiz, soʻnggi nafasimizgacha tinmay qoʻllab-quvvatladingiz.

Faoliyatimda meni yangi sinov kutib turibdi, lekin bu erda boshdan kechirganlarimni hech qachon unutmayman. "Lans" doimo yuragimda qoladi va mening bir qismim hamisha "Sang et Or" ("qon-oltin" – "Lans"ning laqabi – tahr.) boʻlib qoladi.

"Lans"ning bir boʻlagi boʻlganimdan faxrlanaman!
“Zamin” yangiliklarini “Telegram”da kuzatib boring