Farhod Nishonov: "Shunday darajaga chiqdikki, raqiblar bizni jiddiy oʻrganmoqda"

Oʻzbekiston U-20 terma jamoasi Qatarda Xitoydagi Osiyo kubogiga tayyorgarlikni davom ettirmoqda.

Terma jamoa ustozi Farhod Nishonov oʻtkazilgan oʻrtoqlik uchrashuvlari va tayyorgarlik jarayonlari bilan oʻrtoqlashdi.

"Qatardagi birinchi yigʻinimizda futbolchilarning umumiy jismoniy holati ustida ish olib borildi. Ikkinchi yigʻinimizda futbolchilarning imkoniyatlarini koʻrib olyapmiz. Chempionatimiz tugagani sababli ularni oʻyin tempiga moslashtirib borish uchun oʻrtoqlik uchrashuvlari oʻtkazmoqdamiz. Oʻrtoqlik uchrashuvlaridagi maqsadimiz natija emas.

Hozir natijaga erishamiz deb xatoga yoʻl qoʻyishimiz mumkin. Xitoydagi musobaqaga futbolchilarni optimal holatda olib borishimiz kerak. Kecha magʻlubiyatga uchradik, Suriya bilan durang oʻynadik. Muxlislar magʻlubiyatdan xafa boʻlishgani tabiiy holat va buni toʻgʻri qabul qilamiz. Biz Xitoyda eng yaxshi oʻyinimiz va natijamizni koʻrsatishimiz kerak.

Yakuniy tarkib aniq. Xitoy bilan oxirgi oʻrtoqlik uchrashuvimizdan soʻng asosiy tarkibni aniqlaymiz. Raqiblarimiz jiddiy. Shunday darajaga chiqdikki, ular bizni jiddiy oʻrganishmoqda. Biz ham ularni oʻrganmoqdamiz. Deylik, Yaman bilan bitta mehmonxonada yashayapmiz. Ularning imkoniyatlarini koʻryapmiz. Maqsadimiz Jahon chempionatiga chiqish va biz bor imkoniyatimizdan foydalanamiz", - deydi Farhod Nishonov.

Manba: OʻFA matbuot xizmati “Zamin” yangiliklarini “Telegram”da kuzatib boring