Anchelotti: "Gvardiolaga qarshi oʻyinlarga tayyorlanish – dahshat, chunki u doim hayratlantiradi"

"Real Madrid" bosh murabbiyi Karlo Anchelotti Chempionlar Ligasi 1/8 final bosqichi doirasida "Manchester Siti"ga qarshi boʻlib oʻtadigan oʻyindan avval Pep Gvardiola haqida oʻz fikrlarini bildirdi. Italyan mutaxassisi ispaniyalik murabbiyni zamonaviy futbolga inqilobiy oʻzgarishlar olib kirgan insonlardan biri deb hisoblashini ta'kidladi.

"Pep – zamonaviy futbolga ulkan hissa qoʻshgan murabbiylardan biri. U nafaqat taktik jihatdan oʻziga xos yondashuvlarga ega, balki jamoasiga doim yangi gʻoyalar va uslublar olib kiradi. Men uni juda hurmat qilaman. Agar u dunyoning eng yaxshi murabbiyi boʻlmasa ham, shubhasiz, eng yaxshilaridan biri. Unga qarshi oʻynash va bellashuvlarga tayyorlanish har doim katta qiyinchilik tugʻdiradi, chunki u siz kutmagan taktik echimlar bilan sizga syurpriz qilishi mumkin. Unga qarshi oʻyinlarda hech qachon oldindan natijani bashorat qilish mumkin emas. Shuning uchun bu haqiqiy sinov boʻladi." – dedi Anchelotti.

Hal qiluvchi toʻqnashuvlar yaqinlashmoqda

Evropa futbolidagi eng katta qarama-qarshiliklardan biri hisoblangan "Real Madrid" va "Manchester Siti" oʻrtasidagi birinchi oʻyin bugun tunda Angliyada, "Etixad" stadionida boʻlib oʻtadi. Jamoalar oʻrtasidagi javob bahsi esa 19 fevral kuni Ispaniya poytaxti Madriddagi "Santyago Bernabeu"da oʻtkaziladi.

Bu ikki klub oʻtgan mavsumlarda ham Chempionlar Ligasida jami 14 marta toʻqnash kelgan boʻlib, "Manchester Siti" umumiy hisobda 5 marta gʻalaba qozongan, "Real"ning gʻalabasi 4 ta, 5 oʻyin durang natija bilan yakunlangan.

Oldimizda turgan oʻyin nafaqat ikki kuchli klub oʻrtasidagi jang, balki dunyodagi eng yaxshi ikki murabbiyning mahorat sinovi ham boʻladi. Futbol muxlislari taktik kurashga boy va jonli oʻyinni kutmoqda. “Zamin” yangiliklarini “Telegram”da kuzatib boring