Ulug‘bek Baqoyev jamoasining kechagi mag‘lubiyati haqida nimalar dedi?

"Buxoro" - "Bunyodkor" (0:2) uchrashuvidan so‘ng buxoroliklar ustozi Ulug‘bek Baqoyev matbuot anjumanida quyidagi fikrlarni bildirib o‘tdi.

- Birinchi bo‘limda tengma-teng o‘yin bo‘ldi. Tanaffusgacha yaxshiroq o‘ynadik, deb ayta olaman. Ikkita gol urishimiz ham mumkin edi. Realizatsiya masalasida oqsadik. Ikkinchi bo‘limda esa "Bunyodkor" futbolchilari kutishda davom etishdi va yakunda gol urishdi. Birinchi golni rikoshetdan, keyingisini esa burchak zarbasidan so‘ng o‘tkazib yubordik. Jamoamga hech qanday e’tirozim yo‘q. Biz yaxshi o‘ynadik, ammo vaziyatlardan foydalana olmaganimiz tufayli pand yedik. "Bunyodkor"ni g‘alaba bilan tabriklayman.

- "Buxoro" o‘z vaziyatlaridan yaxshi foydalana olmadimi yoki "Bunyodkor" yaxshi himoyalandimi? O‘yin natijasiga qaysi faktor ko‘proq ta’sir qildi, deb o‘ylaysiz?

- Ikki teng jamoalar maydonda edi. Ikki jamoa ham tartibli o‘yin namoyish etdi, ammo bu futbol. Rikoshet ro‘y bergan vaziyat bizga ta’sir qildi. Bu omadsiz holat bo‘ldi, xolos. "Bunyodkor" g‘alabani ko‘proq istagan shekilli, omad ularga kulib boqdi.

- O‘tgan mavsum "Buxoro" safida Artyom Filiposyan, Vitaliy Denisov va Jasur Hasanov kabi tajribali, ammo yoshi katta futbolchilar o‘ynagandi. Joriy mavsumda esa Ravshan Xayrullayev, Javohir Ro‘ziyev kabi yosh futbolchilar asosiy tarkibdan joy olishmoqda. Joriy mavsum startidan avval jamoani yoshartirishga qaror qildingizmi?

- Men futbolchilarning yoshiga qaramayman. Kim mening talablarimga javob bersa, o‘sha futbolchi o‘ynayveradi. Yosh va pasportning ahamiyati yo‘q. Biz bilan birga bo‘lgan yigitlarga katta rahmat aytaman, ular biz bilan birga bo‘lishdi. Yosh futbolchilar esa o‘yin amaliyotiga ega bo‘lishga loyiq ekanligini ko‘rsatishmoqda. “Zamin” yangiliklarini “Telegram”da kuzatib boring