O‘zbekiston boksi yangi yulduzga ega: Ruslan Abdullayev faxrli g‘alabani nishonladi! (video)

20 aprel kuni AQSHda bo‘lib o‘tgan boks oqshomida o‘zbekistonlik yosh va iste’dodli bokschi Ruslan Abdullayev professional karyerasidagi ikkinchi jangini o‘tkazdi va filippinlik raqibi Jino Rodrigoni mag‘lub etib, muhim g‘alabani qo‘lga kiritdi.

Jang "Golden Boy" promouterlik kompaniyasi tomonidan tashkil etildi va 8 raund davomida asosan Abdullayevning ustunligi ostida kechdi. Uning tezligi, texnikasi va kuchli zarbalari tomoshabinlarni hayratga soldi. Haqqoniy va qiziqarli kechgan jang yakunida hakamlar bir ovozdan 80-71 hisobida Ruslanning g‘alabasini e’lon qilishdi.

Bu g‘alaba bilan Ruslan Abdullayev WBA super yengil vazn toifasida "Continental Americas Gold" chempionlik kamarini egalladi. Shu tariqa u professional ringdagi ikkinchi jangidayoq o‘zbek boks muxlislariga katta umid bag‘ishladi.

Eslatib o‘tamiz, mart oyida debyut jangini meksikalik raqibi Xose Valenzuyela Alvaradoga qarshi o‘tkazib, nokaut bilan g‘alaba qozongan Ruslan, ikkinchi jangida ham ajoyib ko‘rinish berdi va o‘zining katta potensialini yana bir bor namoyon qildi.

Raqibi Jino Rodrigo esa professional ringda 19 jang o‘tkazgan tajribali bokschi bo‘lib, 13 marta g‘alaba qozonib, 4 marta mag‘lub bo‘lgan va 2 marta durang qayd etgan edi. Bu g‘alaba Abdullayevning professional ringdagi mavqeini yanada ko‘tardi va uning kelgusi katta janglariga ishonch uyg‘otdi.

Ruslan Abdullayevning g‘alabasi bilan O‘zbekiston professional boksi yana bir yangi yulduzga ega bo‘ldi. Uning kelgusidagi janglarini intiqlik bilan kutib qolamiz! “Zamin”ni Telegramʻda oʻqing!