«Real» kutilmaganda bir yulduzdan voz kechib, Arda Gyulerga ishonch bildirmoqchi

Madridning «Real» klubi yaqin vaqtgacha asosiy tarkibning muhim a’zolaridan biri bo‘lgan Braim Dias bilan bog‘liq holat yuzasidan kutilmagan qaror qabul qildi. Bu haqda taniqli ispan jurnalisti Santi Ortego xabar bermoqda.

Ma’lum bo‘lishicha, klub rahbariyati va murabbiylar shtabi so‘nggi vaqtlardagi o‘yinlarda 25 yoshli marokashlik yarim himoyachining namoyish etayotgan harakatlaridan umuman qoniqmayapti. Madridliklar futbolchi yuqori darajadagi sport formasini ushlab qola olmayotganini asosiy sabab sifatida ko‘rsatmoqda.

Shu munosabat bilan jamoa rahbariyati va murabbiylar shtabi Braim Dias o‘rniga turkiyalik yosh iqtidor egasi Arda Gyulerga ishonch bildirmoqchi. Qayd etilishicha, 20 yoshli Arda o‘ziga berilgan imkoniyatlardan samarali foydalanib, murabbiylarning e’tiborini qozona olgan.

Ayni paytda Braim Diasning «Real» bilan shartnomasi 2027 yil yozigacha mo‘ljallangan. Ammo u jamoadagi o‘rni tobora murakkablashib borayotganiga qaramay, «qaymoqranglilar»ni tark etish niyatida emas. Dias asosiy tarkibdagi joyi uchun istalgan raqib bilan kurashishga tayyor ekanligini ma’lum qilgan.

Shu tariqa, «Real» murabbiylari uchun yana bir murakkab qaror kutib turibdi – klub yoshlariga ishonch bildirish yoki sobiq yetakchiga yana bir imkon berish. Bu qaror, albatta, jamoaning keyingi o‘yin natijalari va taktik rejalariga ham ta’sir ko‘rsatadi. “Zamin”ni Telegramʻda oʻqing!