Abbosbek Fayzullayev: «O‘zbekiston termasi hozir Rossiyadan kuchliroq»

O‘zbekiston milliy terma jamoasi va Moskva SSKA klubining iqtidorli yarim himoyachisi Abbosbek Fayzullayev, ayni paytda O‘zbekiston terma jamoasini Rossiya terma jamoasidan kuchliroq deb hisoblamoqda.

Futbolchi O‘zbekistonda hozirgi kunda juda kuchli futbolchilardan tashkil topgan eng yaxshi avlod shakllanganiga alohida urg‘u berdi. U shu bilan birga, Rossiya terma jamoasi ham sifatli va yaxshi o‘yinchilarga ega ekanligini tan oldi.

«O‘zbekistonda futbolchilarning ayni damdagi eng kuchli avlodlaridan biri bor. Rossiya terma jamoasining ham tarkibi yomon emas, ularning bir necha o‘yinlarini ko‘rib boryapman. Hatto raqiblar ancha kuchsiz bo‘lsa ham, tarkib juda baquvvat. Masalan, Golovin va yana bir qancha yulduz o‘yinchilar bor», — dedi Fayzullayev.

Shu bilan birga, jurnalistning «o‘rtoqlik o‘yinida g‘alaba qozonish ehtimoli qaysi jamoada ko‘proq?» degan savoliga Abbosbek qat’iyat bilan javob berdi:

«Men har doim o‘z yurtimni qo‘llab-quvvatlayman va O‘zbekiston tomonidaman. Menimcha, O‘zbekiston terma jamoasi Rossiyani mag‘lub etgan bo‘lardi», — deb qo‘shimcha qildi futbolchi.

Abbosbek Fayzullayev Moskva klubi bilan birga yuqori saviyali futbol namoyish etib kelmoqda, u O‘zbekiston milliy termasining ham yorqin yulduzlaridan biri sifatida tanilgan. “Zamin”ni Telegramʻda oʻqing!