Qatar milliy jamoasini mashhur ispaniyalik mutaxassis boshqaradigan bo‘ldi

Ispaniya milliy terma jamoasi va Madridning "Real" klubining sobiq bosh murabbiyi Xulen Lopetegi rasman Qatar milliy terma jamoasining bosh murabbiyi sifatida tayinlandi. Bu haqda bir qator xorijiy nashrlar va ekspertlar, jumladan, taniqli jurnalist Fabritsio Romano ham xabar tarqatdi.

Ma’lumki, Xulen Lopetegi o‘zining murabbiylik faoliyati davomida ko‘plab nufuzli klublarda faoliyat olib borgan. U Ispaniya milliy terma jamoasidan tashqari, Portugaliyaning "Portu", Ispaniyaning "Real Madrid" va "Sevilya" klublarini ham boshqargan. Lopetegi oxirgi marta Angliyaning "Vest Xem" jamoasida ishlab, joriy yil yanvar oyida o‘z lavozimini tark etgan edi.

Hozirgi paytda Qatar terma jamoasi 2026 yilda bo‘lib o‘tadigan futbol bo‘yicha jahon chempionati saralash bahslarida ishtirok etib kelmoqda. Qatarliklar saralash bosqichining 8-turidan keyin o‘z hisoblariga 10 ochko yozib qo‘ygan va guruhda 4-pog‘onani egallab turishibdi.

Qatar terma jamoasini oldinda muhim ikki uchrashuv kutib turibdi. Ular saralashning navbatdagi o‘yinlarida Eron hamda O‘zbekiston milliy jamoalariga qarshi bahs olib borishadi. Xulen Lopetegi Qatar jamoasi boshqaruviga kelishi bilan terma jamoa natijalarini yaxshilash va jahon chempionatiga yo‘llanma olish maqsadida jiddiy tayyorgarlikni boshlashi kutilmoqda.

Mutaxassislar Qatar futbol federatsiyasining bu qarorini mamlakat futboli taraqqiyoti uchun muhim qadam sifatida baholamoqda. Lopetegining boy tajribasi va yuqori professionalligi Qatar milliy jamoasining o‘yinini kuchaytirish va xalqaro maydondagi nufuzini oshirishda muhim omil bo‘lishi mumkin.

Eslatib o‘tamiz, O‘zbekiston milliy terma jamoasi 10 iyun kuni Toshkentda aynan Lopetegi boshqaruvidagi Qatar termasiga qarshi maydonga tushadi. Bu o‘yin saralash bosqichidagi vaziyat uchun hal qiluvchi ahamiyat kasb etishi mumkinligi aytilmoqda. “Zamin”ni Telegramʻda oʻqing!