Abbosbek Fayzullayev «SSKA» safida ajoyib o‘yin o‘tkazdi — uning harakatlari qanday baholandi?

Rossiya Premer-ligasining 27-turidan o‘rin olgan "Axmat" – SSKA jamoalari o‘rtasidagi qizg‘in bahs 1:1 hisobida durang bilan yakunlandi. Uchrashuv Grozniy shahridagi «Axmat Arena» stadionida bo‘lib o‘tdi va jamoalar muxlislarga keskin va qiziqarli futbol namoyish etdi.

Ushbu bahsda Moskva jamoasining o‘zbekistonlik yarim himoyachisi Abbosbek Fayzullayev ham ishtirok etdi va asosiy tarkibdan joy oldi. Hamyurtimiz 90 daqiqa davomida maydonda bo‘lib, o‘zining faol harakatlari bilan murabbiylar va ekspertlarning e’tiborini tortdi.

Abbosbek o‘yin davomida bir necha bor jamoasining xavfli vaziyatlarini yaratishga yordam berdi, hujumdagi sheriklariga yaxshi paslar uzatdi. Shiddatli kechgan bellashuvning 57-daqiqasida hakam unga ogohlantirish kartochkasini ko‘rsatdi, biroq futbolchimiz bundan so‘ng ham maydondagi samarali harakatlarini davom ettirdi.

Uchrashuvdan so‘ng futbolchilarning harakatlariga baho berish bilan shug‘ullanadigan mashhur Sofascore nashri Abbosbek Fayzullayevga yuqori baho — 7,4 ball berdi. Ushbu reyting jamoasida eng yaxshi ko‘rsatkichlardan biri bo‘lib, o‘zbekistonlik futbolchining o‘yin darajasi yuqoriligidan dalolatdir.

Hozirgi paytda SSKA jamoasi Rossiya chempionatida 52 ochko bilan turnir jadvalida 3-o‘rinni egallab turibdi. Abbosbek Fayzullayev esa SSKAning asosiy tarkibidagi o‘rnini yanada mustahkamlamoqda va jamoaning keyingi o‘yinlarida ham muhim rol o‘ynashi kutilmoqda.

O‘zbekistonlik yarim himoyachi bu mavsumda Rossiya Premer-ligasida 20 dan ortiq o‘yinda ishtirok etdi va o‘zining ajoyib harakatlari bilan Moskva klubi ishqibozlari qalbidan joy olishga erishdi. “Zamin”ni Telegramʻda oʻqing!