"Nasaf" yetakchisi “Paxtakor”ga qarshi o‘yinda nega maydonga tushmadi?

13 may kuni bo‘lib o‘tgan O‘zbekiston kubogining guruh bosqich 3-turidan o‘rin olgan bellashuvda "Paxtakor" va "Nasaf" jamoalari o‘zaro kuch sinashdi. Bu qarama-qarshilikda "sherlar" 6:3 hisobida g‘alaba qozondi va futbol jamoatchiligining e’tiborini tortdi.

Biroq ushbu o‘yinda "Nasaf"ning asosiy futbolchilaridan biri, milliy terma jamoa a’zosi Sherzod Nasrullayevning o‘yin qaydnomasidan ham o‘rin olmagani ko‘pchilikni ajablantirdi va xavotirga soldi.

40 daraja isitma: shoshilinch davolanish zarur bo‘ldi

"Championat.asia" sayti futbolchining holati bilan qiziqdi va ishonchli manbalardan ma’lum bo‘lishicha, chap qanot himoyachisining tana harorati o‘yin arafasida 40 darajagacha ko‘tarilgan. Tabiiyki, bu holatda uning maydonga tushishi nafaqat samarasiz, balki xavfli bo‘lishi mumkin edi. Shu bois murabbiylar shtabi uni qaydnomadan chiqarib tashlashga qaror qildi.

Ayni vaqtda Sherzod Nasrullayev o‘z uyida tibbiy nazoratda bo‘lib, ahvoli barqarorlashmoqda. Agar barchasi rejadagiday ketsa, futbolchi katta ehtimol bilan iyun oyidagi milliy terma jamoa yig‘inlari va JCH–2026 saralash bahslarigacha safga qaytishi mumkin.

Oldindagi muhim uchrashuvlar

O‘zbekiston milliy terma jamoasini Jahon chempionati–2026 saralash bosqichi doirasida juda muhim ikki bellashuv kutib turibdi. 5 iyun kuni termamiz BAAga qarshi safarda, 10 iyun kuni esa Qatarga qarshi Toshkentda maydonga tushadi.

Bu o‘yinlarda bosh murabbiy Temur Kapadze uchun himoya chizig‘idagi barqarorlik va tajriba katta ahamiyatga ega bo‘ladi. Sherzod Nasrullayevning safga qaytishi esa jamoa uchun jiddiy kuch bo‘lishi mumkin.

Zamin.uz tahririyati futbolchimizga tezroq sog‘ayishni, milliy jamoamizga esa muvaffaqiyat tilaydi. Siz Nasrullayevning milliy jamoadagi rolini qanday baholaysiz? “Zamin”ni Telegramʻda oʻqing!