“Bavariya”da shok jarohat: Musiala maydondan uzoq muddat chetda qoladi

FIFA tomonidan yangi formatda o‘tkazilayotgan klublar o‘rtasidagi jahon chempionati chorak finalida katta intrigaga boy uchrashuv bo‘lib o‘tdi. “Pari Sen-Jermen” va Germaniya grandi “Bavariya” jamoalari o‘zaro to‘qnash kelgan bellashuvda futbol ishqibozlari haqiqiy dramaning guvohi bo‘lishdi.

Parijliklar o‘yinda ikki futbolchisi maydondan chetlatilganiga qaramay, yuqori ruh va intizom bilan harakat qilishdi. Bundesliga chempioni bo‘lgan “Bavariya” darvozasiga javobsiz ikkita to‘p kiritilishi muxlislar uchun kutilmagan natija bo‘ldi. PSJ da o‘z so‘zini aytgan o‘yinchilar, qarshi hujumda ajoyib mahorat namoyon etib, raqib himoyasini ikki bor ojiz qoldirishdi.

Biroq, “Bavariya” jamoasi faqat mag‘lubiyat bilangina cheklanib qolmadi. Uchrashuvning birinchi bo‘limi oxirida, tajribali posbon Janluiji Donnarumma bilan to‘qnashuv natijasida jamoaning yosh va hujumkor yulduzi Jamol Musiala og‘ir jarohat oldi. Ma’lumotlarga ko‘ra, unda oyoq singani va mushak bog‘lamlari zararlangani aniqlangan.

Bild nashri ta’kidlashicha, 22 yoshli Musialani kamida to‘rt-besh oy maydonda ko‘rmaslik ehtimoli bor. Mutasaddilar va futbol muhitidagi ko‘plab ekspertlar bu jarohat “Bavariya” uchun mavsumdagi eng yirik yo‘qotishlardan biri bo‘lishini aytishmoqda.

Hozirgi kunda “Bavariya” uchun asosiy vazifa — yosh futbolchini sog‘lom holda jamoaga qaytarish va qolgan uchrashuvlarda uning o‘rnini to‘ldirish bo‘ladi. PSJ esa jarohatlar va qiyinchiliklarga qaramay, chempionatda ilgarilab bormoqda. “Zamin”ni Telegramʻda oʻqing!