Timur Kapadze OFK taklifi bilan qur’a tashlash marosimida ishtirok etadi

Osiyo futbolidagi eng muhim voqealardan biri — Jahon chempionati saralash bosqichining hal qiluvchi bosqichi uchun qur’a tashlash marosimi yaqinlashmoqda. Rasmiy ma’lumotlarga ko‘ra, 17 iyul kuni soat 15:00 da ushbu marosim katta tantana bilan o‘tkaziladi. Shu orqali 2026 yilgi mundial sari yo‘l olishni istagan Osiyo terma jamoalari uchun so‘nggi bosqich yo‘nalishi aniqlashadi.

Saytimiz manbalariga ko‘ra, Osiyo futbol konfederatsiyasi (OFK) o‘zbekistonlik futbol ixlosmandlari uchun yangilik bo‘ladigan muhim qadam tashladi. Xususan, mamlakatimiz terma jamoasini Olimpiya o‘yinlari va Jahon chempionatiga olib chiqqan mashhur mutaxassis Timur Kapadze qur’a tashlash marosimida maxsus mehmon sifatida ishtirok etish uchun taklif etildi. U guruhlarni aniqlab berishda ishtirok etadi.

Mazkur bosqichda Osiyo mintaqasidan 6 jamoa ishtirok etadi. Ular FIFA reytingiga ko‘ra quyidagi savatchalarga ajratilgan:

1-savatcha: Qatar, Saudiya Arabistoni
2-savatcha: Iroq, Birlashgan Arab Amirliklari
3-savatcha: Ummon, Indoneziya

Qur’a natijasida har bir guruhga 3 tadan jamoa joylashadi. Ikkita guruhdan faqat g‘olib chiqqanlar Jahon chempionatiga to‘g‘ridan to‘g‘ri yo‘llanmani qo‘lga kiritadi. Qolgan jamoalar esa keyingi imkoniyatlar uchun kurashni davom ettiradi.

OFKning Timur Kapadzeni tanlashi bejiz emas. U nafaqat O‘zbekiston futbolining rivojiga o‘z hissasini qo‘shgan, balki xalqaro miqyosda ham obro‘-e’tibor qozongan murabbiy sifatida taniladi. Uning ishtirokidagi qur’a tashlash marosimi nafaqat sport nuqtayi nazaridan, balki ma’naviy jihatdan ham alohida ahamiyat kasb etadi.

Mazkur bosqichning guruh o‘yinlari 8 oktyabrdan 14 oktyabrgacha o‘tkazilishi rejalashtirilgan. Futbol ishqibozlari uchun esa bu fursat — terma jamoalarning salohiyatini baholash, kelajak chempionlar yurishiga guvoh bo‘lish imkoniyatidir.

Shunday ekan, 17 iyul kuni bo‘lib o‘tadigan qur’a tashlash marosimi nafaqat futbol dunyosida, balki O‘zbekistonda ham katta qiziqish bilan kuzatilishi kutilmoqda. Timur Kapadzedek shaxsning u yerda ishtiroki esa marosimga alohida shuko‘h bag‘ishlaydi. “Zamin”ni Telegramʻda oʻqing!