Qarshi shahrining mashhur klubi “Nasaf” asosiy tarkib futbolchilaridan biri Alibek Davronov bilan hamkorlikni yana bir necha yilga davom ettiradigan bo‘ldi. Klub rahbariyati 22 yoshli markaziy himoyachi bilan shartnomani 2027 yilning 31 dekabriga qadar uzaytirishga erishdi.
Alibek Davronov o‘tgan mavsumda qarshiliklar safida muhim o‘yinlar o‘tkazgan. U jami 8 marta maydonga tushib, himoyada barqaror o‘yin namoyish etgani bilan bir qatorda, “1+1” natija qayd etgan — bir gol urib, bir golli pas uzatishga erishgan.
Uning barqaror o‘yin ko‘rsatgani va yoshligi bilan birga professional rivojlanish potensiali katta ekani mutaxassislar tomonidan ham e’tirof etilmoqda. Transfermarkt portali Davronovni 500 ming yevroga baholagan.
“Nasaf” muxlislari esa Alibekning yangi shartnoma ostida yanada katta mas’uliyat va ilhom bilan o‘ynashi, himoyada kuchli bo‘lishi va kelgusi mavsumlarda yangi yutuqlar olib kelishini kutishmoqda. Klubning yosh himoyachisidan katta maqsadlar va kelajakda yangi marralar kutilyapti.
