Turkiya Superligasi oxirgi yillarda Yevropada eng jadal o‘sish va rivojlanishni namoyon etayotgan chempionatlar qatoriga kirgani barchamizga ma’lum. Turk futbol klublari so‘nggi paytlarda jahonning tan olingan o‘yinchilari hamda tajribali murabbiylarini o‘z jamoalariga jalb etishda faol harakat qilmoqda.
Shu jarayonda turk klublarida to‘p tepayotgan o‘zbekistonlik futbolchilar soni ham ortib borayotgani quvonarli hol. Masalan, bir necha mavsum avval Otabek Shukurov “Fotih Karagyumryuk” va “Kayserispor” jamoalarida muvaffaqiyatli o‘yin ko‘rsatgan edi. Shuningdek, o‘tgan mavsum Azizbek Turg‘unboyev “Sivasspor” sharafini, Husniddin Aliqulov esa “Rizespor” sharafini himoya qilgan.
Kelgusi mavsum boshlanishi bilan o‘zbekistonlik futbol ishqibozlari Turkiya chempionatida ayniqsa “Istanbul Bashakshehir” klubiga ko‘proq qiziqish bilan qaramoqda. O‘tgan mavsumni beshinchi o‘rinda yakunlagan bu jamoa yaqinda o‘z tarkibini Eldor Shomurodov bilan to‘ldirdi.
30 yoshga kirgan hujumchimiz, UYEFA Konferensiyalar ligasi ikkinchi saralash bosqichida Bolgariyaning “Cherno More” klubiga qarshi o‘yinda ilk marta “Bashakshehir” tarkibida maydonga tushdi va o‘zining rasmiy debyutini nishonladi.
Bundan tashqari, “Istanbul Bashakshehir” tarkibini yana bir o‘zbek talanti — Abbosbek Fayzullayev ham kuchaytirish arafasida. Turk futboli haqida puxta bilimga ega rossiyalik ekspert Elvin Kerimovning ta’kidlashicha, Fayzullayev ushbu klubda o‘z so‘zini ayta oladi va yetakchilardan biriga aylanishi mumkin.
Kerimovning fikriga ko‘ra: “Abbosbek Fayzullayev nafaqat “Istanbul Bashakshehir” uchun, balki butun liga uchun yulduzga aylanish imkoniyatiga ega. Jamoa juda nufuzli va mo‘tabar, undagi o‘yinchilar orasida super yulduzlar ko‘p emas, lekin harakatda barqarorlik yuqori. E’tiborga molik futbolchilardan biri — Usseyn Ba. Bu himoyachi o‘z vaqtida “Olimpiakos”da ancha yil to‘p surgan va Yevrokuboklarda katta tajriba to‘plagan.”
Kerimov yana shunday fikr bildirdi: “Klub safida yana bir qimmatli o‘yinchi – “Beshiktosh”dan kelgan, Turkiya milliy jamoasida ham o‘ynagan Onur Bulut bor. Uning malakasiga shak-shubha yo‘q. Shuningdek, Deniz Tyuryuch ham “Fenerbahche” va Turkiya terma jamoasidagi tajribasi bilan ajralib turadi. Ayniqsa, uning “Old Trafford”dagi jarima zarbasidan “Manchester Yunayted”ga urgan goli muxlislar va mutaxassislar xotirasidan o‘chmagan.”
Tayanch yarim himoyada Berat O‘zdemir “Trabzonspor” bilan chempionlikka erishgan. Portugaliyalik legioner Migel Kreshpu esa, o‘z yurtida mashhur murabbiy Jorju Jezush qo‘li ostida muhim rol o‘ynagan.
Shuningdek, “Istanbul Bashakshehir” safida Germaniya futbolida tarbiya topgan Berkay O‘zjan va “Marsel”da o‘sgan, bir necha yil avval Turkiya chempionatini larzaga keltirgan Yusuf Sari ham bor.
Hujum chizig‘ida esa Germaniya Bundesligasida tajriba orttirgan Deyvi Zelke to‘p suradi. U “Verder”, “Gerta”, “Leypsig”, “Kyoln” kabi grandlarda o‘z nomini tiklagan.
Klubning darvozaboni Muhammad Shengezer esa Turkiya chempionatida oyoqda to‘pni yaxshi o‘ynay oladigan posbonlardan biri sifatida e’tirof etiladi. Shuningdek, u Konferensiyalar ligasida ikki golli pas bilan ham muxlislarni lol qoldirgan.
Bosh murabbiy Chag‘dash Atan uchun jamoadagi har bir o‘yinchining salohiyati va professionallik darajasi juda katta ahamiyatga ega ekanini Elvin Kerimov ham alohida ta’kidladi.
Shuni ham eslatish joizki, “Istanbul Bashakshehir”ning yana bir yangi hujumchisi Eldor Shomurodov ham o‘z mahorati va tajribasi bilan ajralib turadi. “Roma”dan to‘liq transfer qilish huquqi bilan ijaraga olingan bu o‘zbek futbolchisi klubning eng qimmatli ikki o‘yinchisidan biri bo‘lib turibdi.
Transfermarkt portali ma’lumotlariga ko‘ra, Shomurodov va ganalik Jerom Opokuning transfer bahosi 5 million yevroni tashkil etadi.
E’tiborlisi, Abbosbek Fayzullayev “Bashakshehir”ga o‘tganidan so‘ng, jamoaning eng qimmat futbolchisiga aylanadi. Chunki 21 yoshli hujumchimiz transfermarkt'da 8 million yevro bo‘yicha baholangan.
Bunday o‘zgarishlar va yangi imzolar Turkiya Superligasida o‘zbek futbolchilarining nufuzi va rolini yanada oshirishi tabiiy. Yangi mavsumda bu yigitlardan kim qanday natija qiladi — muxlislar katta ishonch va qiziqish bilan kuzatishda davom etadi.
