Abu-Dabidagi mashhur “Etihad Arena” majmuasida UFC on ABC 9 musobaqasi bo‘lib o‘tdi. Turnir doirasida O‘zbekiston vakili, aralash jang san’ati (MMA) ustasi Bogdan Guskov rossiyalik jangchi Nikita Krilov bilan oktagonga chiqdi.
Yuksak keskinlikda o‘tgan jang uzoqqa cho‘zilmadi. Guskov raqibini birinchi raundning o‘zida kuchli zarbalar bilan yerga yotqizib, nokaut orqali zafar quchdi. Bu natija UFC tomoshabinlari uchun kutilmagan holat bo‘ldi va Guskovning professional tayyorgarligi yana bir bor o‘z isbotini topdi.
Jangdan so‘ng oktagonda intervyu bergan Guskov: “Men vaqtimni kutdim va undan foydalandim. Bu natijaga erishishimga ishonardim. Jamoadoshlarimga va murabbiylarimga rahmat aytaman”, — dedi. Uning so‘zlari mehmonlar va muxlislar tomonidan iliq qabul qilindi.
Ma’lumot o‘rnida aytish joizki, bu g‘alaba Bogdan Guskov uchun UFC’dagi to‘rtinchi muvaffaqiyatli jang bo‘ldi. U umumiy rekordini 4-1 ga yetkazdi. Qolaversa, so‘nggi to‘rt jangning barchasini u vaqtli — nokaut yoki texnik nokaut bilan yakunlagan.
Guskovning har bir jangi nafaqat uning shaxsiy sport yo‘nalishida, balki butun O‘zbekiston MMA maktabining xalqaro miqyosdagi obro‘sini oshirishga xizmat qilmoqda. Muxlislar uning keyingi jangini katta qiziqish bilan kutmoqda.
“Zamin”ni Telegramʻda oʻqing!
