Yevropa futbolida eng barqaror va kuchli jamoalardan biri sanaladigan “Manchester Siti” o‘z tarkibining markaziy figuralaridan biri – Rodri bilan yangi shartnoma imzolashga bel bog‘ladi, deb xabar bermoqda angliyalik nashrlar. Bu qaror Ispaniya terma jamoasining so‘nggi yillardagi yetakchilaridan biriga aylangan futbolchining kelajagini yanada oydinlashtirdi.
29 yoshli mahoratli yarim himoyachi bilan tuziladigan yangi kelishuvga ko‘ra, u “Etixad”da kamida 2029 yilning 30 iyuniga qadar qoladi. Bu kelishuv “Real Madrid” tomonidan bildirilayotgan jiddiy qiziqishlar fonida amalga oshirilmoqda. Madridliklar Rodrini o‘z saflariga qo‘shib olish niyatida ekanligini bir necha marta yashirmagan va bu “Siti” rahbariyatini vaziyatni o‘z qo‘liga olishga majbur qildi.
Ma’lumotlarga ko‘ra, Rodrining amaldagi shartnomasi 2027 yilning yozigacha amal qiladi. Biroq klub bu muddatni yana ikki yilga uzaytirishga qaror qilgan. Bu orqali “shaharliklar” o‘z o‘yin uslubida muhim rol o‘ynaydigan futbolchini saqlab qolishni xohlamoqda.
E’tiborlisi, agar Rodri taklif etilayotgan yangi shartnomani qabul qilsa, u klubdagi eng ko‘p maosh oluvchi futbolchilardan biriga aylanadi. Hozirda eng yuqori haq to‘lanadigan futbolchi — norvegiyalik superhujumchi Erling Xoland hisoblanadi.
Rodri 2019 yilda “Atletiko Madrid”dan “Manchester Siti”ga ko‘chib o‘tgan va shundan beri jamoaning o‘zagiga aylangan. Universal o‘yin uslubi, to‘pni aniq nazoratda ushlash qobiliyati va taktik zehni bilan jamoaning ko‘plab yutuqlarida bevosita hissa qo‘shgan. Ammo o‘tgan mavsumda u jiddiy jarohat tufayli bir necha oy maydonga tusha olmadi, bu esa uning maydondagi ahamiyatini yanada ayonroq qildi.
Angliya va Ispaniyadagi ishonchli manbalar ta’kidlashiga qaraganda, Rodrining o‘zi ham “Real”dan tushayotgan takliflarga qaramasdan, “Manchester Siti”da faoliyat olib borishni afzal bilishini ma’lum qilgan. Xususan, u bosh murabbiy Xosep Gvardiolaning rahbarligida yanada yuksalishga ishonadi.
Shunday qilib, agar ikki tomon kelishuvga erishsa, Rodrining kelajagi yana 4 yil davomida “Siti” bilan bog‘liq bo‘ladi. Bu nafaqat jamoa muxlislarini xursand qiladi, balki Premer-ligadagi kuchlar muvozanatiga ham jiddiy ta’sir ko‘rsatishi mumkin.
