Angliya Premyer-ligasida kutilmagan voqea sodir bo‘lmoqda — “Nyukasl” klubi rahbariyati va jamoaning yetakchi to‘purari, Shvetsiya terma jamoasi hujumchisi Aleksandr Isaak o‘rtasidagi ziddiyat tobora kuchayib bormoqda. Hozirgi vaziyat shundayki, yaqin orada bu muammo hal bo‘lishiga ishonish qiyin.
Ishning mohiyatiga to‘xtalsak, Aleksandr Isaak o‘z faoliyatini boshqa jamoada davom ettirish niyatida. Manbalarga ko‘ra, hujumchi “Liverpul” safida to‘p surishni orzu qilmoqda. Arne Slot boshchiligidagi “qizillar” esa bu o‘yinchi uchun “Nyukasl”ga 110 million funt-sterling miqdorida rekord badal taklif qilgan. Biroq “qarg‘alar” rahbariyati keskin rad javobini berdi va futbolchi sotilmasligini qatʼiy maʼlum qildi.
Taniqli sport jurnalisti Ben Jeykobs tarqatgan maʼlumotga ko‘ra, Isaak “Nyukasl” safida qolgan taqdirda ham bu klub uchun maydonga chiqmasligini ochiq aytgan. Bu esa munosabatlarni yana-da taranglashtirdi.
Yana bir ishonchli manba — The Times nashri yozishicha, 25 yoshli forvard so‘nggi uch yil davomida yashab kelgan uyini ham tark etgan. Bu qadam ko‘pchilik tomonidan uning “Nyukasl”ga qaytish ehtimoli yo‘qligining ochiq dalili sifatida baholanmoqda.
Aleksandr Isaak “Nyukasl” safidagi faoliyati davomida jami 109 ta uchrashuvda maydonga tushdi. U shu o‘yinlarda raqib darvozasini 62 marta ishg‘ol qilib, jamoadoshlariga yana 11 ta golli uzatma yo‘lladi. Uning samarali o‘yini va doimiy xavf sola olishi muxlislar qalbida alohida o‘rin egallab ulgurgan edi.
Hozirgi ziddiyat klub va futbolchi munosabatlarini butunlay uzishi mumkin. Bu esa nafaqat “Nyukasl”ning hujumdagi kuchini sezilarli darajada pasaytiradi, balki Premyer-liga transfer bozorida ham katta shov-shuvga sabab bo‘lishi aniq.
“Zamin”ni Telegramʻda oʻqing!
