Angliya Premer-ligasida yuqori pog‘onalarni egallashni maqsad qilgan Londonning “Tottenxem” klubi yozgi transfer bozorida jiddiy qadam tashlashga bel bog‘ladi. Manbalarga ko‘ra, “shporlar” o‘z tarkibini kuchaytirish maqsadida “Manchester Siti” safidagi yosh va iqtidorli braziliyalik hujumkor futbolchi Savioni qo‘lga kiritish yo‘lida harakat boshlagan.
Qizig‘i shundaki, 21 yoshli futbolchining o‘zi ham poytaxt klubiga ko‘chib o‘tish fikriga yomon qaramayapti. Bu esa “Tottenxem” uchun muzokaralar jarayonida kichik, ammo muhim ustunlik sifatida ko‘rilishi mumkin.
Biroq, insayder jurnalist Jek Pitt-Bruk ta’kidlashicha, “Manchester Siti” hozircha Savioni sotish niyatida emas. Xosep Gvardiola esa yangi mavsumda o‘yini sezilarli ravishda o‘sib borayotgan shogirdini raqib klubga berish masalasini hatto muhokama qilishga ham tayyor emas.
Savio o‘tgan mavsumda turli musobaqalarda jami 48 ta bahsda maydonga tushib, 3 ta gol urishi va 13 ta golli pasi bilan o‘z nomini yorqin ko‘rsata oldi. Bu raqamlar uning yoshiga qaraganda ancha samarali natija hisoblanadi.
Futbolchining “Manchester Siti” bilan amaldagi shartnomasi 2029 yilgacha mo‘ljallangan. Transfermarkt portali esa uning bozor qiymatini 50 million yevro atrofida baholamoqda. Shu bois, “Tottenxem” ushbu transfer amalga oshishi uchun katta moliyaviy resurs sarf etishiga to‘g‘ri kelishi mumkin.
Agar “Siti” o‘z pozitsiyasidan chekinmasa, bu o‘tkazish “Tottenxem” uchun faqat orzu bo‘lib qolishi ehtimoldan xoli emas. Ammo saviyali yosh hujumchiga bo‘lgan qiziqish Premer-ligadagi raqobatning qanchalik qizg‘inligini yana bir bor ko‘rsatib turibdi.
