Superliganing 19-turidan o‘rin olgan derbi — “Navbahor” va “Neftchi” jamoalari o‘rtasidagi bahs (0:1) yakuniga yetgach, namanganliklar bosh murabbiyi Sergey Lushchan matbuot anjumanida ishtirok etib, uchrashuv va jamoa holati haqida batafsil to‘xtalib o‘tdi.
— Bugun maydonda haqiqiy kurash kechdi. Derbi o‘z nomi bilan derbi bo‘ldi. Birinchi bo‘limda raqib katta ustunlikka ega chiqdi, biz esa hujumda deyarli hech narsa qila olmadik. O‘yin bir gol bilan hal bo‘lishi kutilgandi — kim xato qilsa, o‘sha mag‘lub bo‘lishi ehtimoli katta edi. Achinarlisi, bu xatoga biz yo‘l qo‘ydik. Darvozabonimizni ayblay olmayman, chunki zarba juda kuchli chiqdi. Bunday go‘zal gollar futbolda doim uchrab turadi. “Neftchi”ni g‘alaba bilan tabriklayman — ularning tarkibi hozir bizdan kuchliroq, — dedi Lushchan.
Murabbiydan “Navbahor” o‘z o‘yinini ko‘rsatishiga nimalar xalaqit berdi?” degan savolga u shunday javob qaytardi:
— Eng avvalo raqib xalaqit berdi. Futbolda xatolarsiz bahs bo‘lmaydi, biz ham, raqib ham xatolarga yo‘l qo‘ydik. Lekin taqdirni bitta gol hal qildi. “Andijon”ga qarshi o‘yinimiz misolida ko‘rish mumkin: 0:0 tugashi ham ehtimol edi, ammo biz bitta zarba bilan g‘alabani ta’minladik. Futbol ana shunday o‘yin.
Jamoaning mavsum yakunidagi maqsadlari haqida Lushchan ochiq so‘zladi:
— Men bashoratchi emasman. Ishni to‘xtatganimiz yo‘q, mehnat qilyapmiz. Lekin muammolarimiz bor, balki ular boshqalarga nisbatan ko‘proqdir. Yanvarda yig‘in boshlaganimizda faqat bitta futbolchi bor edi. Har qanday murabbiyga besh oyda to‘liq jamoa tuzish oson emas. Gvardiola misolida ko‘rasiz: “Manchester Siti” uchun 1,5 milliard sarflandi, shunda ham uchinchi mavsumga kelib chempionlikni qo‘lga kiritishdi. Bizda esa bunday imkoniyatlar yo‘q. Shunday bo‘lsa-da, 2027 yilgacha chempionlik va Kubok uchun kurashish vazifasini oldimizga qo‘yganmiz. Buning uchun barcha omillar uyg‘un bo‘lishi shart.
Mag‘lubiyatdan keyin darvozabon bilan suhbati haqida ham murabbiy fikr bildirdi:
— Unga ruhiy qo‘llab-quvvatlash berdik. Xatolar bo‘ladi, bu futbolning bir qismi. U yaxshi posbon, bundan shubha yo‘q. Endi asosiy e’tiborni Kubok bahsiga qaratishimiz lozim.
Anjumanda standart vaziyatlar haqida ham savol berildi:
— Bizda Jiyanov, Komilov kabi standartlarni mahorat bilan ijro etadigan futbolchilar bor. Zamonaviy futbolda standart vaziyatlar hal qiluvchi ahamiyatga ega. Bugun ham harakat qildik, ammo natija bermadi. Superligada hozir oson o‘yin qolmadi — barcha jamoalar yuksak saviyada o‘ynayapti. Biz xatolarni tahlil qilamiz va ishda davom etamiz, — deya bayonot berdi Lushchan.
Xulosa qilib aytganda, “Navbahor” derbida mag‘lub bo‘lsa-da, Lushchanning so‘zlaridan jamoa ruhan tushmagani va kelgusi bahslarga tayyorgarlikni jiddiy olib borayotganini anglash mumkin. Murabbiyning eng katta shiori esa aniq: mag‘lubiyatdan to‘g‘ri xulosa chiqarish va oldinga qarash.
