Braziliyalik mahoratli yarim himoyachi Duglas Luis yana Angliya maydonlariga yo‘l oldi. “Yuventus” safida ko‘p vaqt o‘tkazmagan futbolchi endi o‘z faoliyatini Premer-ligada davom ettiradi. Italiya klubi rasman uni “Nottingem Forest”ga bir yilga ijaraga berganini ma’lum qildi. Shartnomaga ko‘ra, futbolchi sotib olish imkoniyati bilan ijaraga berilgan va kelishuvning umumiy narxi 30 million yevro atrofida baholanmoqda.
The Sun nashrining yozishicha, sotib olish majburiyati braziliyalik futbolchining qay darajada ko‘p o‘yinlarda maydonga tushishiga bog‘liq bo‘ladi. Agar u belgilangan sonida uchrashuvlarda ishtirok etmasa, “o‘rmonchilar” uni taxminan 30 million yevroga xarid qilish huquqiga ega bo‘ladi.
Eslatib o‘tamiz, Luis 2024 yil yozida “Yuventus” safiga qo‘shilgan edi. Ammo o‘tgan mavsumda u barcha musobaqalarda bor-yo‘g‘i 27 ta o‘yinda maydonga tushdi va birorta ham samarali harakat — gol yoki golli uzatma qayd etmadi. Bu holat futbolchiga bo‘lgan ishonchga salbiy ta’sir ko‘rsatgani aytiladi.
Shu bilan birga, u hali ham yosh va kuchga to‘la futbolchi sifatida ko‘riladi. Braziliyalikning klub bilan amaldagi shartnomasi 2029 yil yozigacha amal qiladi. Transfermarkt portali ma’lumotlariga ko‘ra, Luisning bozor qiymati hozirda ham 30 million yevroni tashkil etmoqda.
“Nottingem Forest” rahbariyati undan katta umid qiladi. Chunki jamoa o‘rta chiziqda tajribali va jangovor futbolchiga ehtiyoj sezayotgan edi. Luisning qaytadan APLga qadam qo‘yishi ham futbolchi uchun yangi imkoniyatlar eshigini ochishi, ham Premer-ligaga yanada qiziqish uyg‘otishi mumkin.
Futbol tahlilchilari fikricha, agar Luis Angliya chempionatida o‘zini ko‘rsata olsa, u nafaqat “Forest”ning asosiy yetakchilari qatoriga qo‘shiladi, balki yana yirik klublarning diqqat markaziga ham tushishi mumkin.
