Ligalar kubogi yarim finali jonkuyar muhitda kechdi va unda Lionel Messi yana bir bor jamoasi uchun qahramonga aylandi. 38 yoshli argentinalik yulduz “Inter Mayami” safida maydonga qaytib, dubl qayd etdi hamda finalga yo‘llanmani ta’minladi.
Messi avvalgi ikki uchrashuvni jarohati sababli o‘tkazib yuborgandi. Biroq “Orlando Siti”ga qarshi o‘yinda u o‘ziga xos liderlik sifatini yana namoyon qildi. Dastlab 77-daqiqada penaltini aniq ijro etib, hisobni tenglashtirdi. Keyin esa 88-daqiqada jamoasi uchun g‘alaba to‘pini kiritib, muxlislarga quvonch ulashdi.
— Bu bahsda maydonga tushishni qattiq istadim. “Los-Anjeles”ga qarshi o‘yindan so‘ng biroz noqulaylik sezgandim, lekin “Orlando Siti”ga qarshi uchrashuvga jiddiy tayyorgarlik ko‘rdim. Chunki bu bellashuvning ahamiyati va raqibning kuchini yaxshi bilardim. Joriy mavsumda ularni ikki marta mag‘lub eta olmagan edik. Birinchi bo‘limda tezligim yetmadi, ammo tanaffusdan keyin o‘zimni yengil va erkin his qildim, — dedi Messi “Inter Miami News Hub”ga bergan intervyusida.
Shu tariqa, “Inter Mayami” finalda “Los-Anjeles” — “Sietl Saunders” juftligi g‘olibi bilan bahs olib boradi. Muxlislar esa Messining yangi rekordi va yorqin o‘yinini intiqlik bilan kutishmoqda.
