“Real Madrid”ning sobiq hujumchisi va murabbiyi Xorxe Valdano Chempionlar ligasi qur’asi haqida o‘z munosabatini bildirdi. Uning fikricha, “Barselona”ga tushgan jadval “Real”nikidan ancha qulay ko‘rinadi.
— “Real” uchun qur’a unchalik ham omadli chiqmadi. Hatto qayerdadir yengil ko‘rinadigan o‘yinlar ham jiddiy qiyinchiliklar tug‘dirishi mumkin. “Barsa”ning yo‘li nisbatan osonroq, ammo bunday jadvalda hech bir jamoa to‘liq hordiq chiqarish imkoniga ega emas. Qur’a har bir klub uchun muhim ahamiyat kasb etadi — raqiblar tayyorgarlik jarayoniga ham ta’sir qiladi, — dedi Valdano “Movistar” kanaliga bergan intervyusida.
U shuningdek, “Real”ning Olmaotaga safar qilishiga ham to‘xtaldi. — Bu masofa jihatidan deyarli Nyu-Yorkka borish bilan barobar, balki undan ham uzoq. Bu tartibda safarlar futbolchilar uchun qo‘shimcha sinov bo‘ladi, — deya ta’kidladi mutaxassis.
Qur’a natijalariga ko‘ra, “Real Madrid” o‘z maydonida “Manchester Siti”, “Yuventus”, “Marsel” va “Monako”ga qarshi bahs olib boradi. Safarda esa “Liverpul”, “Benfika”, “Olimpiakos” va Qozog‘istonning “Qayrat” klubiga qarshi o‘ynashiga to‘g‘ri keladi.
“Barselona” esa o‘z uyida PSJ, “Ayntraxt”, “Olimpiakos” va “Kopengagen” bilan kuch sinashadi. Safarda esa katalonlar “Chelsi”, “Bryugge”, “Slaviya Praga” hamda “Nyukasl”ga qarshi maydonga chiqadi.
Ma’lumot uchun, Madriddan Olmaotaga masofa taxminan 6 440 kilometr, Nyu-Yorkkacha esa 5 770 kilometrni tashkil qiladi.
Muttaxassislar fikricha, bunday uzoq safarlar “Real” uchun turnirdagi yo‘lni qiyinlashtirishi mumkin. Muxlislar esa katta qiziqish bilan ikki ispan grandi qanday natija qayd etishini kutmoqda.
