O‘mon milliy jamoasi bosh murabbiyi Karlush Keyrush matbuot anjumanida O‘zbekiston futboli haqida o‘z qarashlari bilan o‘rtoqlashdi. Taҗribali mutaxassis so‘zlariga ko‘ra, so‘nggi yillarda o‘zbek futbolining rivojlanish sur’ati barcha tomondan yaqqol sezilmoqda.
— O‘zbekiston terma jamoasi haqida menda aniq ma’lumotlar mavjud. Jamoa haqida yaxshi fikrdaman. Ular juda o‘sishdi. Bir necha yil oldin biz o‘zbeklardan bir necha qadam ilgariroq edik, ammo o‘sha paytlardayoq sizlarda o‘sish jarayoni boshlanganini his qilganman, — dedi Keyrush.
Uning ta’kidlashicha, mamlakatda futbol sohasida tizimli islohotlar amalga oshirilmoqda va bu samara allaqachon natijalarda ko‘rinib turibdi. — O‘zbekiston futbolni qanday yo‘nalishda rivojlantirish kerakligini tushunib yetdi. Bu hozir natijalarda ham aks etmoqda. Terma jamoangiz Jahon chempionatiga chiqdi, bir qator futbolchilaringiz esa Yevropada o‘zini ishonchli ko‘rsatmoqda. Rivojlanish uzoq yo‘l, lekin sizlar tez sur’atda olg‘a yuribsizlar, — deya qayd etdi murabbiy.
Keyrush, shuningdek, bir necha yil avval o‘zbek futboli ancha sust holatda bo‘lganini, hozir esa butunlay boshqacha manzara kuzatilayotganini qayd etdi: — Bir paytlar O‘zbekiston futboli “uyqu”da edi. Hozirda esa sizlar juda tez va ishonchli harakat qilayapsizlar. Osiyodagi boshqa jamoalar esa hali ham “uyqu”da, — deya qo‘shimcha qildi u.
Murabbiy fikricha, natijaga erishish faqat murabbiy almashishi bilan emas, yoshlarga ishonish va ularga imkoniyat berish bilan bog‘liq. — Biz ham bu turnirga yosh futbolchilarni olib keldik. Ular sizlar kabi futbolga chanqoq. Shu bilan yaxshi natijalarga erishish mumkin, — dedi Keyrush.
Shuningdek, u O‘zbekiston milliy jamoasiga bosh murabbiy sifatida tayinlanishi mumkin bo‘lgan hamyurti Paulu Bentu haqida ham to‘xtalib o‘tdi: — Bentu katta tajribaga ega bo‘lgan ajoyib murabbiy. U haqiqiy professional. Futbolchilik faoliyati ham muvaffaqiyatli o‘tgan. Unga faqat eng yaxshi tilaklarni tilayman. U juda kuchli mutaxassis, — deya ta’rif berdi Keyrush.
Keyrush: “O‘zbekiston futboli uyqudan uyg‘ondi va tez o‘smoqda”
Ctrl
Enter
Xato topdIngizmi
Iborani ajratib Ctrl+Enter tugmasini bosing
Mavzuga oid yangiliklar