CAFA Nations Cup-2025 musobaqasi oldidan Turkmaniston milliy terma jamoasi bosh murabbiyi Rovshan Meredov ommaviy axborot vositalari vakillari bilan suhbatda jamoa rejalari va maqsadlari haqida to‘xtalib o‘tdi.
— Barcha raqiblarga hurmatimiz baland, biroq biz maydonda o‘z o‘yinimizni ko‘rsatishga intilmoqdamiz. Hozirgi asosiy maqsadimiz — Osiyo kubogiga yo‘llanmani qo‘lga kiritish, — dedi Meredov.
Murabbiy ta’kidlashicha, FIFAning rasmiy kunlari hali boshlanmagani uchun jamoaning barcha yetakchi futbolchilari yig‘inda ishtirok etmayapti. — Masalan, Mingazov va Chariyev hozircha biz bilan emas. Ammo musobaqa yakuniga qadar ular tarkibga qo‘shilishi mumkin, — deya qo‘shimcha qildi u.
Ommaviy axborot vakillaridan biri so‘nggi yillarda turkmanistonlik futbolchilar O‘zbekiston Superligasida deyarli to‘p surmayotgani haqida savol yo‘lladi. Meredov bu masalaga quyidagicha munosabat bildirdi: — Bu savol menga emas. Balki bu futbolchilar o‘z yurtimizga ko‘proq kerakdir. Turkmaniston iqtidorli yoshlarga boy mamlakat. Ularga to‘g‘ri yo‘l ko‘rsata olsak, katta natijalarga erishishimiz mumkin.
Mutaxassis so‘zlariga ko‘ra, jamoa uchun CAFA musobaqasi nafaqat tayyorgarlik, balki futbolchilar uchun o‘z salohiyatini namoyon qilish maydoni bo‘lib xizmat qiladi. Muxlislar esa turkmanistonlik yigitlar qanday o‘yin ko‘rsatishini qiziqish bilan kutmoqda.
