Paulo Bentu: Osiyo tajribasi, raqamlar va intizom yo‘li...

Paulo Bentu O‘zbekiston Milliy terma jamoasi bosh murabbiyi bo‘lishi tobora oydinlashib bormoqda. Bu mutaxassisni ko‘pchilik Birlashgan Arab Amirliklari va Portugaliyada qayd etgan natijalariga qarab baholayapti, shuning uchun ba’zi muxlislarda unga nisbatan ishonchsizlik kayfiyati ham shakllanib bormoqda.

Portugaliyalik murabbiy Paulo Bentu Toshkentga yetib keldi. U O‘zbekiston milliy jamoasi bilan shartnoma imzolashi kutilmoqda. Bentu faoliyatining so‘nggi yetti yilini Osiyoda o‘tkazmoqda: 2018–2022-yillarda Janubiy Koreya termasini, 2023–2025-yillarda esa BAA terma jamoasini boshqardi.

Portugaliyalik mutaxassis 2018-yil 17-avgust kuni Janubiy Koreya terma jamoasi bosh murabbiyi etib tayinlandi. Ilk yirik sinov — Osiyo kubogi-2019 bo‘ldi: BAAdagi musobaqada koreyaliklar guruhda 1-o‘rinni oldi, nimchorak finalda Bahraynni qo‘shimcha vaqtda yengdi va chorak finalda Qatarga 0:1 hisobida mag‘lub bo‘ldi.

JCH-2022 saralashida jamoa so‘nggi bosqichni Erondan (25 ochko) keyin 23 ochko bilan 2-o‘rinda yakunladi. Qatar Mundialida esa guruh bosqichini 2-o‘rinda tamomlab (Urugvayni ortda qoldirgan holda), nimchorak finalda Braziliyaga 1:4 hisobida imkoniyatni boy berdi. Shundan so‘ng Bentu iste’fo berdi — bu qarorni u 2022-yil sentyabridayoq o‘zi uchun belgilaganini va dam olishni istaganini aytdi, ya’ni shartnoma oxirigacha ishladi.

Paulo Bentu 2023-yil 9-iyulda BAA termasi bosh murabbiyiga aylandi. JCH-2026 saralashida kutilgan marralarga yetisha olmadi va 2025-yil 26-mart kuni assosatsiya uni shtabi bilan birga lavozimidan ozod etdi.

Paulo Bentu nisbatan hujumkor yondashuv tarafdori: faol pressing, pozitsion intizom va balandroq sur’atni talab qiladi. Janubiy Koreyada tarkib sifati yuqori bo‘lgani uchun bu uslub samara berdi. Ammo BAA bilan kuchliroq raqiblarga (Eron va O‘zbekiston) qarshi o‘yinlarda muvaffaqiyatsizlikka duch keldi.

Portugaliya (2010–2014): 47 o‘yin, 26 g‘alaba, 12 durang, 9 mag‘lubiyat, PPM 1.89.

Janubiy Koreya (2018–2022): 57 o‘yin, 35 g‘alaba, 13 durang, 9 mag‘lubiyat, PPM 2.07.

BAA (2023–2025): 26 o‘yin, 14 g‘alaba, 6 durang, 3 mag‘lubiyat, PPM 1.81.

E’tirozlardan hozir foyda yo‘q — Bento termamiz bosh murabbiyi bo‘lishi deyarli aniq, unga to‘liq baho berish imkoni hali oldinda. Agar BAAdagi natijalar fonida uni «yomon murabbiy» deb atayotgan bo‘lsak, Janubiy Koreya bilan Mundialdagidek muvaffaqiyatli chiqish unga yuqori bahoni ham berdira oladi: u Portugaliya, Urugvay va Gana kabi jamoalar to‘plangan guruhdan chiqishni uddaladi.

Qo‘shimcha tarzda eslatsak: Bentu boshchiligidagi BAA O‘zbekiston va Eronga qarshi bellashuvlarda yo‘qotishlarga uchradi, biroq shu terma Qatarni 5:0 hisobida yirik mag‘lubiyatga uchratgan. Demak, uning jamoalari odatda ancha hujumkor, himoyada esa doim ham mukammal emas. Ko‘pchilik Katanetsni buning «aksi» bo‘lgani uchun tanqid qilardi; Bentu — muxlislar xohlagan tipga yaqin va, eng muhimi, mayda nom emas.

Qaror qabul qilingan ekan, bunga ta’sir o‘tkaza olmaymiz — faqat Mundialdan keyin xulosa chiqaramiz. Hozircha eng to‘g‘risi: yangi murabbiyga ishonch vaqti, intizom va rejaga sodiqlik. Raqamlar va tajriba bor — endi ularni maysa ustidagi natijaga aylantirish qoldi.