"Manchester Yunayted"ning sobiq himoyachisi Viktor Lindelof o‘z faoliyatini Angliya chempionatining boshqa klubida davom ettiradi. Bir necha oy oldin erkin agent sifatida mankunianliklar tarkibini tark etgan shved futbolchisi endi “Aston Villa” safida to‘p tepishi kutilmoqda.
Ma’lumotlarga ko‘ra, 31 yoshli tajribali himoyachiga yozda “Fiorentina” hamda “Everton” jamoalari ham qiziqish bildirgandi. Biroq futbolchiga ko‘proq ma’qul kelgan taklif Birmingem klubidan bo‘ldi. Shu bois tomonlar 1+1 ko‘rinishidagi shartnoma bo‘yicha kelishuvga erishdi. Yaqin kunlarda u tibbiy ko‘rikdan o‘tishi kutilayotir.
Eslatib o‘tamiz, Viktor Lindelof 2017 yilning yozida “Benfika”dan “Manchester Yunayted” safini to‘ldirgandi. Mankunianliklar tarkibida o‘tgan 8 mavsum davomida u 284 ta rasmiy uchrashuvda maydonga tushdi. Shu vaqt ichida shved himoyachisi raqib darvozalariga 4 ta gol urdi va jamoadoshlariga 7 ta golli uzatma berdi.
Endi esa u “Aston Villa” safida yangi sahifani ochish arafasida turibdi. Muxlislar esa uning yangi klubdagi tajribasini katta qiziqish bilan kuzatishi shubhasiz.
