Londonning mashhur klubi «Arsenal» tarkibida to‘p surib kelayotgan braziliyalik hujumchi Gabriel Martinelli so‘nggi vaqtlarda ijtimoiy tarmoqlarda unga qaratilgan tanqidiy fikrlarga o‘z munosabatini bildirdi.
"Internet orqali menga qaratilgan har xil tanqidlarni ko‘rib qolaman va bu holat meni achintiradi hamda ranjitadi. Agar gol ursam — meni Ronaldino deb maqtashadi, ammo agar maydonda gol urish imkoniyatidan foydalanmasam — haqoratlar va salbiy so‘zlar yoziladi. Shunga qaramay, ishonch bilan ayta olamanki, bu mavsumda meni ko‘proq tilga olasizlar: maydonda gollar uraman, sheriklarimga golli uzatmalar berib, jamoamga yordam ko‘rsataman", — deya ta’kidladi yosh yulduz.
Martinellining bu fikrlari ko‘plab muxlislar orasida qiziqish uyg‘otdi. Uning so‘zlariga ko‘ra, tanqid uni sinashdan tashqari, yanada kuchliroq ishlashga undaydi. Futbolchi o‘z ishonchini yo‘qotmasdan, muxlislarning talab va intizoriga munosib bo‘lish niyatida ekanini qayd etdi.
Eslatib o‘tamiz, braziliyalik hujumchi 2019 yildan buyon «Arsenal» klubi sharafini himoya qilib kelmoqda. Joriy mavsumda u Angliya Premer-Ligasining ikki uchrashuvida maydonga tushdi, ammo hozirgacha na gol urish, na assist qilish imkoniyatini qo‘lga kirita olmadi.
Shu bilan birga, mutaxassislar va sport jurnalistlari Martinellining potensiali juda yuqori ekanini ta’kidlashmoqda. Uning texnikasi, tezligi va maydondagi harakatchanligi katta o‘yinlarda hal qiluvchi ahamiyat kasb etishi mumkin.
Gabriel Martinellining tanqidlarga nisbatan bildirgan munosabati uning qat’iyatliligi va o‘z kuchiga ishonchini ko‘rsatdi. Hujumchi o‘z so‘zlariga ko‘ra, bu mavsumda muxlislarga ko‘proq yoqimli lahzalar taqdim etishga bel bog‘lagan. Endi barcha «Arsenal» muxlislari braziliyalik yulduzning yangi gollari va assistlarini sabrsizlik bilan kutmoqda.
“Zamin”ni Telegramʻda oʻqing!
