Yevropa futbolida sensatsiya yangilik. Ispaniyaning mashhur klubi «Barselona» o‘z hujum chizig‘ini yangilash niyatida va bu yo‘lda «Manchester Siti»ning norvegiyalik yulduzi Erling Holand nomzodini ko‘rib chiqmoqda. Bu haqda Football Insider nashri orqali xabar tarqaldi.
Manbalarning aytishicha, kataloniyaliklar 37 yoshga kirgan polyak hujumchisi Robert Levandovskining uzoq muddatli vorisini izlashga kirishgan. Ular Holandni aynan shu maqsadda asosiy nomzod sifatida belgilashmoqda. Levandovskining amaldagi shartnomasi 2025/2026 yilgi mavsum yakunlanishi bilan tugaydi va «Barsa» hujum chizig‘ida bo‘shliq qolmasligi uchun harakatga o‘tmoqchi.
Ma’lumki, Erling Holand 2022-yilda «Borussiya Dortmund»dan «Manchester Siti»ga qo‘shilgan edi. Shundan beri u «shaharliklar» safida 151 ta o‘yinda maydonga tushib, 130 ta gol urdi va yana 21 ta golli uzatma berdi. Bu ko‘rsatkichlar uni zamonaviy futbolning eng xavfli va samarador hujumchilaridan biri sifatida namoyon etmoqda.
Hozirgi vaqtda Holandning «Siti» bilan tuzgan shartnomasi 2034-yil yoziga qadar amal qiladi. Bu esa uning transferi o‘ta murakkab va qimmatga tushishini anglatadi. Transfermarkt ma’lumotlariga ko‘ra, futbolchining bozor bahosi 180 million yevroga teng.
Shu bilan birga, «Barselona»ning moliyaviy ahvoli ham masalani yanada murakkablashtiradi. Kataloniya klubi so‘nggi yillarda moliyaviy cheklovlar sabab ko‘plab transferlarda qiyinchiliklarga duch kelgan. Shu bois, Holand kabi supermashhur hujumchini olib kelish uchun katta iqtisodiy strategiya talab qilinadi.
Shuningdek, ayrim insayderlar fikricha, agar Holand «Siti»da keyingi mavsumlarda ham yuqori darajada o‘ynashda davom etsa, uning «Barsa»ga ko‘chib o‘tishi yanada qiyinlashishi mumkin. Ammo katalon muxlislari orasida bu transfer orzusi allaqachon qizg‘in muhokamalarga sabab bo‘ldi.
“Zamin”ni Telegramʻda oʻqing!
