Farer orollari terma jamoasi Jahon chempionati–2026 saralash bosqichida yana bir sensatsiya qayd etdi. Jamoa 8-turda Chexiyani 2:1 hisobida mag‘lub etdi va mundialga chiqish imkoniyatini saqlab qoldi.
Bu g‘alaba orolliklar uchun uchinchi ketma-ket zafar bo‘ldi — bunday natija mamlakat futbol tarixida ilk bor kuzatilmoqda. Avvalgi turlarda jamoa Gibraltarni 1:0, Chernogoriyani esa 4:0 hisobida taslim etgandi.
Hozirgi kunda Farer orollari 7 o‘yinda 12 ochko jamg‘argan va L guruhida 3-pog‘onani egallab turibdi. Chexiya 13 ochko bilan ikkinchi o‘rinda, Xorvatiya esa 16 ochko bilan yetakchilik qilmoqda. Bu natijalar Farer uchun tarixiy imkoniyat eshigini ochdi.
Endilikda jamoani so‘nggi sinov — Xorvatiyaga qarshi mehmondagi uchrashuv kutmoqda. Agar Farer peshqadamni yengsa va Chexiya San-Marino bilan bahsda ochko yo‘qotsa, orolliklar ikkinchi o‘rinni egallab, pley-off bosqichiga yo‘l olishi mumkin.
Mutaxassislar ta’kidlashicha, Farer orollari so‘nggi yillarda nafaqat natija, balki o‘yin uslubida ham katta o‘sishni namoyon etmoqda. Jamoaning jangavor ruhi va intizomi ularni Yevropa futbolining eng qiziq kurashuvchilaridan biriga aylantirgan.
So‘nggi turdagi Xorvatiyaga qarshi bahs Farerlar uchun tarixiy ahamiyat kasb etadi — g‘alaba ularni ilk bor Jahon chempionati sari yaqinlashtiradi.
“Zamin”ni Telegramʻda oʻqing!
