Oʻzbekiston milliy jamoasi sobiq bosh murabbiyi Srechko Kataneçning uch nafar yordamchisi Oʻzbekiston futbol assotsiatsiyasiga (OʻFA) qarshi sudga murojaat qilishga tayyorlanmoqda. Bu haqda Asia Sport nashri xabar tarqatdi.
Manba ma’lumotiga koʻra, sloveniyalik mutaxassislar FIFAning nizolarni hal etish palatasiga da’vo arizasi bilan chiqishni rejalashtirgan. Ular OʻFAdan taxminan 350 ming yevroga yaqin qarz undirish niyatida.
Ma’lum qilinishicha, mazkur murabbiylar bilan 2026 yil yozigacha amal qilish moʻljallangan shartnoma tuzilgan boʻlgan. Biroq Fabio Kannavaro va uning murabbiylar shtabi tayinlangandan keyin, ularning faoliyati toʻxtatilgan.
Holatga yaqin manbalar ta’kidlashicha, OʻFA ularga yoshlar jamoalari tizimida ish davom ettirish imkoniyatini taklif etgan, ammo mutaxassislar bu taklifni qabul qilmagan.
“Bu mutaxassislar bir necha yil davomida milliy jamoani jahon chempionatiga tayyorgarlik jarayonida boshqargan va aynan shu loyiha uchun shartnoma imzolagan edilar. Shu sababli, ular yoshlar jamoasiga oʻtishni toʻgʻri deb hisoblamadilar”, — deb yozadi Asia Sport.
Hozirda FIFAga rasmiy da’vo arizasi tayyorlanmoqda. Agar murojaat qanoatlantirilsa, OʻFA mutaxassislarga shartnomada koʻrsatilgan kompensatsiya miqdorini toʻlab berishga majbur boʻladi.
Mutaxassislar ushbu masalada Oʻzbekiston tomoni bilan bir necha marta muzokara olib borganini, ammo kutilgan natija boʻlmaganini aytishadi. Shu sabab, ular ishni xalqaro futbol organiga olib chiqishga qaror qilgan.
Futbol jamoatchiligi mazkur voqeani turlicha baholamoqda — ayrimlar bu holatni mutaxassislar huquqiy haqini himoya qilish deb hisoblamoqda, boshqalar esa OʻFAning yangi boshqaruv tizimidagi islohotlar natijasi deb koʻrmoqda.
Har holda, FIFA qarorini kutish orqali vaziyatning keyingi yoʻnalishi aniqlanadi — u yoki pulli kelishuv bilan yakunlanadi, yoki sud orqali hal etiladi.
“Zamin”ni Telegramʻda oʻqing!
