«Manchester Siti» bosh murabbiyi Pep Gvardiola jamoa markazini kuchaytirish niyatida. Ispaniyalik mutaxassisning diqqat markazida bu gal «Kristal Pelas» yarimhimoyachisi Adam Uorton turibdi, deb xabar berdi Fichajes nashri.
Ma’lumotlarga ko‘ra, Gvardiola 21 yoshli angliyalik futbolchining o‘yin uslubini yuqori baholaydi va uni Rodri o‘rnidagi kelajakdagi futbolchi sifatida ko‘rayotganini bildirgan. Uning fikricha, Uorton texnik jihatdan yetuk, o‘yinni yaxshi his qiladi va markazda yuqori darajada harakat qila oladi.
Manchester klubi mutaxassislari Uortonni jamoaning uzoq muddatli rejasiga mos futbolchi sifatida ko‘rishmoqda. Gvardiolaning rejasiga ko‘ra, u Rodrining ideal vorisiga aylanishi mumkin.
Biroq bu transfer yo‘nalishida raqobat mavjud — «Manchester Yunayted» ham yosh yarimhimoyachiga qiziqish bildirgan. Manchesterning ikki grand klubi o‘rtasidagi bu kurash Angliya bozorida katta qiziqish uyg‘otishi aniq.
Adam Uorton joriy mavsumda «Kristal Pelas» safida barcha musobaqalarda 10 ta o‘yinda maydonga tushib, bitta golli uzatma muallifi bo‘lgan. Uning tinimsiz harakatchanligi va pas madaniyati murabbiylar e’tiborini tortayotgani aytilmoqda.
Mutasaddilarning fikricha, Gvardiola yosh iqtidorlarni jamoaga qo‘shish orqali kelajak uchun mustahkam poydevor yaratishni maqsad qilgan. Uorton esa shu yo‘nalishdagi navbatdagi potensial bitim bo‘lishi mumkin.
Agar muzokaralar ijobiy yakunlansa, «Manchester Siti» jamoasi Premer-ligada yana bir iste’dodli yarimhimoyachini o‘z safida ko‘rish imkoniyatiga ega bo‘ladi.
“Zamin”ni Telegramʻda oʻqing!
