Angliya futbolida yana sensatsion xabarlar muhokama markazida. Britaniyaning “The Sun” nashri ma’lum qilishicha, “Manchester Siti”ning sobiq bosh murabbiyi Roberto Manchini “qizil iblislar” — “Manchester Yunayted”ni boshqarishga tayyor ekanini bildirgan.
Manbaning yozishicha, italiyalik mutaxassis yaqin atrofdagilarga Ruben Amorim ishdan bo‘shatilgan taqdirda jamoani qabul qilib olishga tayyorligini aytgan. Bu ma’lumot “Old Trafford”dagi vaziyatni yanada qizitdi.
Qizig‘i shundaki, Manchini va “Yunayted” hammulkdori Jim Rëtkliff bir-birini yaxshi taniydi. Ular har ikkisi Fransiyaning janubida yashaydi va turli ijtimoiy tadbirlarda bir necha bor uchrashgan. Bu holat Manchining nomzodini yanada real ko‘rsatmoqda.
Eslatib o‘tamiz, Roberto Manchini 2009–2013 yillar oralig‘ida “Manchester Siti”ni boshqargan va 2012 yilda klubni Angliya Premer-ligasi chempionligiga yetaklagan. Uning rahbarligida “shaharliklar” ko‘p yillik titulsizlikni tugatgan edi.
60 yoshli mutaxassisning oxirgi ish joyi Saudiya Arabistoni terma jamoasi bo‘lgan. Manchini bu lavozimni 2024 yil oktyabrida tark etdi va hozircha rasmiy ravishda erkin agent hisoblanadi.
Agar “Manchester Yunayted”da natijalar yomonlashsa va Ruben Amorim lavozimini yo‘qotsa, Manchining qayta Premer-ligaga qaytishi ehtimoldan xoli emas. Mutaxassisning tajribasi va ingliz futbolidagi obro‘si bu ehtimolni yanada kuchaytiradi.
Ayni paytda klub muxlislari va sport tahlilchilari “Yunayted”ning yangi yo‘nalishi qanday bo‘lishi mumkinligi haqida bahs yuritmoqda — Manchini kabi tajribali murabbiy kelsa, jamoada yangi bosqich boshlanishi mumkinligi ta’kidlanmoqda.
“Zamin”ni Telegramʻda oʻqing!
