O‘zbekiston milliy terma jamoasi noyabr oyidagi FIFA kunlarini bejizga o‘tkazmaydi. Rasman ma’lum qilinishicha, jamoa Dubay shahrida bo‘lib o‘tadigan xalqaro o‘rtoqlik musobaqasida ishtirok etadi.
Turnirda jahon miqyosida taniqli to‘rt terma jamoa — O‘zbekiston, Eron, Misr va Kabo-Verde qatnashadi. Ushbu davlatlar yaqinda bo‘lib o‘tadigan Jahon chempionatiga tayyorgarlik jarayonida bir-biriga qarshi sinov o‘tkazish imkoniga ega bo‘ladi.
O‘zbekiston jamoasining ilk raqibi — Misr termasi bo‘ladi. Bu o‘yin orqali Jahon chempionati ishtirokchisiga qarshi o‘zini sinab ko‘rish va jamoa shaklini baholash imkoni yaratiladi. Bellashuvda g‘olib chiqqan jamoa musobaqa finalida ishtirok etadi, mag‘lub jamoa esa uchinchi o‘rin uchun bahsda maydonga tushadi.
Barcha uchrashuvlar Toshkent vaqti bilan soat 22:00 da boshlanishi belgilangan. Musobaqa nafaqat sportchilar uchun sinov, balki murabbiylar shtabi uchun ham muhim tajriba maydoni bo‘ladi. Chunki xalqaro turnirda raqiblar turli uslubdagi o‘yin namoyon etadi, bu esa taktik tayyorgarlikni boyitadi.
O‘zbekiston termasi uchun bu musobaqa yil yakuni oldidan jamoaviy uyg‘unlikni oshirish, yangi sxemalarni sinab ko‘rish va yosh futbolchilarni xalqaro darajada sinovdan o‘tkazish imkonini beradi.
Ta’kidlash joiz, so‘nggi oylarda terma jamoa ko‘rsatgan o‘yin uslubi, ayniqsa, jismoniy tayyorgarlik va pressingdagi faollik bilan muxlislar va mutaxassislar e’tiborini qozongandi. Shu bois Dubaydagi o‘yinlar nafaqat natija, balki jamoaning umumiy rivojlanish bosqichini namoyon etadigan muhim sinov sifatida ko‘rilmoqda.
Turnir yakunida qaysi jamoa g‘alaba qozonmasin, eng muhimi — termamizning xalqaro maydondagi tajribasi yana bir pog‘onaga ko‘tarilishi bo‘ladi.
“Zamin”ni Telegramʻda oʻqing!
