Angliya Premer-ligasining amaldagi chempioni — “Liverpul” jamoasi Ispaniyadagi eng kutilgan bahs — “El-Klasiko”da maxsus skautlarini ishtirok ettirishga qaror qildi. Klub vakillari 26-oktyabr kuni “Santyago Bernabeu” stadionida bo‘lib o‘tadigan “Real Madrid” hamda “Barselona” o‘rtasidagi titanlar to‘qnashuvini jonli ravishda kuzatishadi.
Defensa Central’ning ma’lum qilishicha, skautlar “Real”ning ikki yosh yarim himoyachisi — Orelen Tchuameni va Eduardo Kamavingani diqqat bilan kuzatadi. Manbaga ko‘ra, mersisaydliklar ularni kelgusi mavsum uchun asosiy transfer maqsadi sifatida belgilagan.
“Liverpul” rahbariyatining fikricha, Tchuameni va Kamavinga hozirgi kunda o‘z pozitsiyasi bo‘yicha Yevropadagi eng yuqori darajadagi ijrochilardan hisoblanadi. Klub sport direktori va murabbiylar shtabi ularning o‘yin uslubi “Liverpul”ning kelgusi strategiyasiga to‘liq mos kelishini ta’kidlamoqda.
Fransiyalik ikki futbolchi so‘nggi mavsumlarda “Real”ning markaziy zonasida asosiy kuchga aylandi. Ular nafaqat himoyada, balki hujumni tashkil etishda ham katta rol o‘ynashadi. “Liverpul” bu ikki futbolchini jamoaning uzoq muddatli qayta qurish rejasi doirasida ko‘rib chiqmoqda.
Ma’lumotlarga ko‘ra, mersisayd klubi yozda ulardan biri uchun rasmiy taklif yo‘llashni rejalashtirayotgan ekan. Biroq bu oson kechmaydi — “Real” rahbariyati har ikki yosh yulduzni strategik futbolchilar deb biladi va ularni sotish niyati yo‘q.
Shu bilan birga, Yevropa transfer bozorida “Liverpul”ning skautlari juda faol harakat qilmoqda. Klub keyingi mavsumda yarim himoya chizig‘ini tubdan yangilashni ko‘zlamoqda. Angliya chempionining bosh murabbiyi yarim himoyada yangi quvvat va raqobat yaratishni muhim vazifa sifatida belgilagan.
Tchuameni va Kamavinga uchun “Liverpul”dan tashqari boshqa top klublar — “Manchester Siti” va “Pari Sen-Jermen” ham qiziqish bildirgani aytilmoqda. Ammo mersisaydliklar ularni jamoaning kelajagi sifatida ko‘rishmoqda.
Eslatib o‘tamiz, “Real Madrid” va “Barselona” o‘rtasidagi 26-oktyabr kuni bo‘ladigan navbatdagi “El-Klasiko” jahon futbolining eng ko‘p kutilgan uchrashuvlaridan biri hisoblanadi. Ushbu bellashuv Toshkent vaqti bilan soat 20:15 da start oladi.
Futbol ekspertlari bu o‘yin nafaqat jamoalarning chempionlik uchun kurashida muhim bo‘lishini, balki Tchuameni va Kamavinga kabi yosh yulduzlar uchun yangi tarixiy imkoniyat bo‘lishini ham ta’kidlashmoqda. “Liverpul” skautlari esa shubhasiz, ularning har bir harakatini diqqat bilan kuzatadi.
“Zamin”ni Telegramʻda oʻqing!
